Теміржолшылар жатқа айтатын әнді шалқарлықтар шығарған
Ақтөбе облысы бойынша меншікті тілші
Теміржолшылардың гимніндей шырқалып жүрген «Теміржолшы» әнін алғаш болып шалқарлықтар тыңдаған. Себебі аудан тұрғындары үшін бұл мамандықтың қадірі жоғары. Мұнда әрбір үшінші тұрғын теміржол саласында еңбек етеді. Кезінде жергілікті теміржолшылар құрметіне туған ән қазір бүкіл ел теміржолшыларының мерейін асқақтатқан маршқа айналды. Қайырмасы: «Қазақстан темір жолы, үміт жолы, Темір жігіттердің өткен өмір жолы... Ғасыр тарихы бар тағылымды, Жаса, жаса, Қазақстан темір жолы!» деген керемет жолдармен қайталанатын ән кешелі бері әлеуметтік желілерде теміржолшыларға жолданып, қолдан қолға өтуде. Шойын жолдың өн бойында тер төгіп жүрген өздері де шойыннан жаралғандай берік теміржолшылар өмірін көз алдыңа әкеліп суреттейтін ырғақты әнді Ақтөбе облысының Шалқар ауданынан шыққан танымал өнер жұлдыздары шығарған. Теміржолшыға рух берген әннің сөзін белгілі ақын Қайнар Алагөзов жазса, әуені композитор Құрал Молжановтікі. Әнді әнші Жаңабай Өтегенов орындайды. Үшеуі де Шалқардан шыққан өнерпаздар.
«Бұл өлеңнің жазылғанына 3-4 жыл болып қалды. Әніміз теміржолшыларға арналған. Оларды қуантқымыз келді. Біз теміржолшылар мекені саналатын Шалқар қаласынанбыз. Өзімнің әке-шешем, атам, бауырларым – түгел теміржолшылар. Әкем Жеткерген Өтегенов электрмен жабдықтау дистанциясында, анам Нағира Кенесарина станция кезекшісі болған. Әніміз теміржолшыларға ұнап жатса, қуаныштымыз. Барша теміржолшыларды кәсіби мерекесімен құттықтаймыз», – дейді әнші Жаңабай Өтегенов.
Ақтөбе орталығынан 365 шақырым қашықта жатқан Шалқар ауданында 50 мыңға жуық тұрғын бар. Мұнда теміржол мекемелері кенттің басты ажары саналады. Олай дейтініміз, тұрғындардың дені осы салада жұмыс істейді. Мұндағы елдің әлеуметтік-экономикалық дамуына теміржол саласының салмағы орасан. Себебі әр отбасын бір теміржолшы асырап отыр. Мұндағы әрбір ауыл тұрғыны «Теміржолшылар» әнін үлкен әсермен және мақтанышпен тыңдайды. «Бұл ән үш-төрт жылдан бері құлағымызда жатталды. Ұжымдық мерекелер осы әнмен өтеді. Теміржолшыларға арналған жүрекжарды ән қазір тек Шалқарда ғана емес, Қазақстан бойынша айтылып жүр. Әнді орындайтын Жаңабай деген баланың әкесі кезінде біздің мекемеде директор болған. Әкесі де әнді жақсы айтатын. Қазіргідей қиын заманда елде тек бейбітшілік болсын», – дейді Шалқар электрмен жабдықтау дистанциясының бастығы Сақыпжан Жұмақов. ...Отарбаның жолы иректеледі, Жолаушылар үнсіз билеп келеді. Қазақ елім бірге қазынасымен, Тепловоздай алға сүйреп келеді... Құлағымызға ән келді, теміржолшылар құрметіне туған әнді іштей біз де қосыла шырқадық. Мереке құтты болсын, құрметті теміржолшылар!