Қызылорда ЖТ бөлімшесінің 80,1 пайызы індетке қарсы екпе салдырды
Қызылорда облысы бойынша меншікті тілші
Темір жолдағы қалыпты жұмыс ырғағы бұзылмауы үшін коронавирусқа қарсы ұжымдық иммунитетті қалыптастыру керек екенін түсінген аймақ теміржолшылары екпе алуды жалғастыруда. Қызылорда ЖТ бөлімшесі кадр бөлімінің маманы Гүлнәр Сахиева бүгінгі таңда бөлімше теміржолшыларының 80,1 пайызы коронавирус инфекциясына қарсы екпе алғанын мәлімдеді. Бөлімшеге қарасты Қазалы вагон пайдалану депосы теміржолшыларының 94,4 пайызы екпе салдырып үлгерген. Одан кейінгі орында ұжымның 86 пайызы екпе алған Қызылорда локомотив пайдалану депосының машинистері де белсенділік танытуда. Қызылорда магистральдық желі бөлімшесі кадр бөлімінің бастығы Айда Нұрмашқызы жалпы ұжымның 90,9 пайызының вакцина алғанын жеткізді. Соның ішінде Қазалы жол дистанциясында ұжымның 97,5 пайызы екпе алған. Демек, қызылордалық теміржолшыларда ұжымдық иммунитет қалыптасты деген сөз. Әйтсе де, әлемдік деңгейдегі инфекциялық індетке қарсы күрес екпе алумен шектелмей, сақтық шаралары күшейтілуде, жұмыс кезінде карантиндік талаптар қатаң сақталып, барлық шаралардың мүмкіндігінше қашықтан атқарылуына мән берілуде.