Кәсіподақ биылдыққа 41 қызметкерге қол ұшын созды
«Қазақстан теміржолшысы» газетінің тілшісі
Бүгінде «Қазақстан темір жолы» компаниясы мен оның жер-жердегі филиалдарында 120 мыңның үстінде адам еңбек етсе, олардың 97 пайызы – кәсіподақ мүшелері. Ай сайын олардың жалақысынан кәсіподақ жарнасына ұсталатын соманың бір бөлігі қайырымдылық мақсатқа жұмсалады. «Бірі бәрі үшін, бәрі бірі үшін» деген корпоративтік ұстанымды ұстанатын теміржолшылар қиын жағдайда қалған әріптестеріне қол ұшын созуды дәстүрге айналдырған. Адам болған соң басыңа қиын іс түспей тұрмайды. Біреу қатерлі дертке шалдықса, енді бір адамның үйі өртеніп немесе су алып, далада қалады. Ал тағы бір адамға ауыр ота жасату керек болуы мүмкін. Мұндай қиындықтар қомақты қаржыны қажет етіп, қиындыққа тап болған теміржолшылар компания кәсіподағына жүгінеді. Қазақстан теміржолының салалық кәсіподағы айына осындай қиындықтарға тап болған 7-8 адамның өтінішін қарайды екен. Былтыр 2020 жылы, мысалы, кәсіподақ 100 теміржолшыға 30 млн теңгеге материалдық көмек көрсеткен. Ал биылғы жыл басынан бері 41 адамға қаржылай көмек берілген. Бұл көмек компания қызметкерінің басына түскен ауыртпалықтан шығуына кететін шығыны 200 мың теңгеден асатын болған жағдайда және арнайы комиссияның жан-жақты тексеруімен әр түрлі сомада болса да міндетті түрде көрсетіледі. «Мәселен, былтыр бір теміржолшы кішкентай баласына Америкада бір екпесі 1 млрд доллар тұратын ем алу үшін көмек сұрады. Ол екпені екі жасқа жеткенше жасатпаса, әрі қарай көмегі тимейді екен, бұл шамамен 982 млн теңге. Соған кәсіподақ арқылы бір бөлігін жабуға болса да көмек жасадық. Олардың барлық медициналық құжаттары, дәрігерлердің науқасқа жазған емі, бүкіл шығындары қағаз жүзінде толық тексеріледі. Мәселен, біреудің үйі өртеніп кеткен болса, соның өртенгені туралы актілерін, су алып кетсе, соны растайтын құжаттарын тексере келе, комиссияның шешімімен теміржолшыларға көмек береміз. Бүгінгі таңда бізде 6 адамның өтініші қаралып жатыр. Оларға міндетті түрде көмек беріледі. Бірақ кімге қанша қаржы берілетінін комиссия шешеді», – дейді «Қазкөліккәсіп» ҚБ төрағасының орынбасары Жұпарбек Сәбитов. Демек, компанияның кәсіподаққа мүше әрбір қызметкері қайырымдылыққа өз үлесін қосып отыр деген сөз.