Шұбарқұдық айналым депосының қызметкерлері жаппай екпе салдырды
Ақтөбе облысы бойынша меншікті тілші
Шұбарқұдық айналым депосының ұжымы және мұндағы станция қыз- меткерлері вирустан қорғалған. Теміржолшылардың дені коронавирус індетіне қарсы екпе алды. Облыс орталығынан Темір ауданына келген түсіндіру тобы теміржол мекемелеріне де бас сұғып, Мемлекет басшысының халыққа Жолдауы, мемлекеттік бағдарламалардың жүзеге асырылуы, тұрғындарды вакциналау, әлеуметтік медициналық сақтандыру, зейнетақы салымдары төңірегінде халық арасында түсіндіру жұмыстарын жүргізді. Аудан әкімі ауыл халқын жұмыспен қамтамасыз етіп отырған теміржол мекемелерінің маңыздылығы мен жауапкершілігіне тоқталды. Екпе алуда белсенділік танытқан теміржолшылардың жауапкершілігіне ризашылығын білдірді. Станция басшысы Алтай Абдуллин мекемеде екпеге қарсы ешкім болмағанын, маңызды шараға бәрі үлкен жауапкершілікпен және түсіністікпен қарағанын жеткізді.
"Мемлекет басшысы айтқандай, пандемия кезінде екпе алу – жауапкершілік. Елдегі қиын жағдайды ұжымдық иммунитет қалыптастырғанда ғана жеңе аламыз. Станцияда еңбек демалысына шыққан қызметкер мен денсаулығына байланысты екпе ала алмай жүрген 2-3 адам бар. Қалған теміржолшылардың барлығы вирусқа қарсы екпе салдырды", – дейді станция басшысы.
Елдегі пандемия жағдайында аурудан қорғанудың жалғыз жолы – вирусқа қарсы екпе алу, ұжымдық иммунитет қалыптастыру. Осы мақсатта құрылған арнайы ақпараттық-түсіндіру тобы елдімекендерді аралап жүр.