Маңғыстау жүк тасымалы бөлімшесі жаңа оқу жылында 1053 оқушыға қаржылай қолдау көрсетті

Биыл жаңа оқу жылын бастаған маңғыстаулық біраз оқушы теміржол мен кәсіподақ ұйымдарынан берілген су жаңа сөмкені ұстап мектепке барды. Білім күніне дайындықтың басты мәселесі шешілген ата-аналар да риза. Бір үйден мектепте төрт бала оқитын отбасылардан 94 балаға «Балаларды мектепке жинаймыз!» акциясы аясында «ҚТЖ» ҰҚ» АҚ атынан сыйлық сөмкелері таратылды. Сондай-ақ, теміржолшылар кәсіподағы тарапынан да аймақ бойынша бірінші сыныпқа баратын 94 бала осындай оқу құрал-жабдықтарымен қамтылды. Одан басқа ұжымдық шартқа байланысты балаларды мектепке дайындау үшін ата-аналарға қаржылай қолдау көрсетілді. Бір ғана жүк тасымалы бөлімшесі бойынша 1053 оқушыға 2 АЕК мөлшерінде көмек берілді. Оның 1020-сы – бір отбасында үштен көп оқушы оқитын жанұялардың, 33-і – екіден көп бала тәрбиелеп отырған жалғызбасты аналардың балалары.

– Барлық бала бірдей, тең құқылы. Білім күнінде ешқайсысы мұңайып қалмауы тиіс. Әркімнің жағдайы әртүрлі. Біреудің әр балаға бірдей жаңа сөмке алып беруді немесе қажет құралдармен толық қамтуды қалтасы көтермеуі мүмкін. Сондай жағдайларды ескере келе мектеп жасында төрт бала және жалғыз- басты ана тәрбиелеп отырған бірінші сыныпқа баратын оқушыларды іріктеп алдық. Кәсіподақ ұйымының атынан мұндай сыйлықты шалғайдағы станцияларға да беріп жібердік. Ақжігіт, Опорная, Сай-Өтес, Өзен, Шетпе, Болашақ, Бейнеу, Маңғыс- тау, Құрық порты станциялары мен №460, 463 бекеттерде тұратын балалар қазір өз сыйлықтарын алып, мектепке барып жүр, – дейді Теміржолшылар кәсіподағының Маңғыстау өңірі бойынша өкілі, Маңғыстау қосалқы бөлімшесі кәсіподақ ұйымының төрағасы Әзірбай Тұрмағанбетов.

Маңғыстау магистральдық желі бөлімшесі персоналды басқару бөлімінің басшысы Азат Төлегеновтің айтуынша, мекемеде 70 балаға оқу құралдары берілген.