«Нұрлы жол» вокзалының қызметкері волонтер ретінде қоғамдық жұмыстарға белсене араласады

Әдетте волонтер десе көз алдымызға жастар елестейді. Бірақ волонтерлік жас таңдамайтын қайырымдылық іс екені белгілі. Теміржолда 28 жылдық тәжірибесі бар, бүгінде «Нұрлы жол» вокзал кешенінің кезекшісі Гүлхан Оңғарова ерікті ретінде жастармен бірге қоғамдық жұмыстарға белсене араласады. Жақында «Нұрлы жол» вокзалы кешенінде басшылықтан «Балаларды мектепке жинайық» акциясына үлес қосуға шақырған үндеу түскен бойда вокзал кезекшісі Гүлхан волонтер ретінде көмек көрсетуге белсене кірісті. Теміржолда 20 жасынан бастап қызмет істеп келе жатқан ол барша әріптестерін ортадан ақша жинап, аз қамтылған отбасыларға көмектесуге шақырды. Оладың бұл әрекеті бірнеше отбасының балаларына қуаныш сыйлады.

– Мамандығымды өте құрметтеймін және сүйемін. Теміржолшы отбасында туып өскен соң бала кезден осы салада оқып, жақсы маман боламын деп армандайтынмын. Аллаға шүкір, арманым орындалып, сүйікті жұмысымды атқарып келемін. Негізгі міндетіме қосымша қоғамдық жұмыстарды атқарудан да бас тартпаймын. Былтырдан бері елімізде жанданған волонтерлік іске де өз үлесімді қосып жүрмін, соған өзім ризамын. Волонтер болу тек жастардың ісі емес, жүрек қалауы, – дейді Гүлхан.

1993 жылы Алматы темір жол техникумын бітірген ол Қазақ жол қатынастары университетінде қашықтан жоғары білім алған. Еңбек жолын Алматы-2 станциясында техникалық кеңсе операторы болып бастаған. Бүгінде елордадағы еңселі вокзал кешенінде жұмысын жалғастыруда. Биылғы теміржолшылар мерекесі Гүлхан Оңғароваға қуаныш сыйлады. Оның көп жылдық қажырлы еңбегі бағаланып, Ұлттық компания басшылығы атынан ол «Адал еңбегі үшін» медалімен марапатталды.