«Мерейлі отбасы» байқауының жеңімпазы - атыраулық теміржолшылар әулеті

Қазақстанда 2013 жылдан бері қыркүйектің екінші жексенбісі Отбасы күні ретінде аталып өтеді. Мақсат – отбасы институтын дамыту мен оның құндылықтарын насихаттау. Осыған орай үлгілі отбасылардың беделін арттырып, құрмет көрсететін «Мерейлі отбасы» республикалық байқауын өткізу дәстүрге айналған. Атыраулық теміржолшылар отбасы биылғы байқаудың жеңімпазы атанды. Құрметті теміржолшы Құрманбек Кенжешов Исатай ауданында тұрады. Жол дистанциясында 44 жыл еңбек етіп, зейнетке шыққан ардагердің өмірлік жары Гүлден Мұхамеджанова да теміржолда еңбек еткен. «1971 жылы әскерден оралған соң теміржолға жұмысқа кірдім. Ганюшкиндегі жол дистанциясында қатардағы жол жөндеуші болып екі жыл еңбек еткен соң басшылар Жамбыл қаласына 11 айлық курсқа жіберіп, білімімді көтеріп келдім. Содан зейнетке шыққанша тынбай тер төгіп, осы саланың отымен кіріп, күлімен шықтық қой, шүкір, абыройсыз болмадық, Құрметті теміржолшы атандым», – дейді отағасы Құрманбек Кенжешов. 4 ұл, 3 қыз тәрбиелеп өсірген ерлі- зайыпты теміржолшылар – бүгінде жиырмаға жуық немере-шөберенің ата-әжесі атанып отырған берекелі де мерекелі үлкен шаңырақ иелері.

«Қайын атам соғысқа қатысқан кісі еді. Тұңғыш немересі өмірге келгенде, қуанышында шек болмады. Ал енеміз мені қызындай көрді, білмегенімді үйретті, ақыл-кеңесін берді. Екеуі де «қайырымды, қарапайым болыңдар, бірлік бар жерде бәрі болады» деп отыратын. Осының бәрі өнеге екен ғой. Қазір мен де келіндерімді қызымдай көремін, енемнен көргенімді жасаймын, айтқанын қайталаймын. Бір үйде екі бала-келінмен бірге тұрамыз», – дейді Гүлден Мұхамеджанова.

Ерлі-зайыпты теміржолшылардың балалары әр салада жұмыс істейді. Әке-шешесінің еңбек жолын ұлдары Асылбек жалғаған. «Теміржолда 2006 жылдан бері вагон қараушы болып жұмыс істеймін. Бұл саланы таңдауыма әке-шешемнің ықпалы болған шығар. Олардың абыройлы еңбек жолын жалғастыру – парызым», – дейді ұлы Асылбек. Байқауға қатысуға ауылдық округ басшылығы ұсыныс білдірген. Сөйтіп олар аудандағы 8 отбасының арасынан үздік шығып, облыс көлемінде 50 отбасы арасында бақ сынады. Байқауға отбасы туралы деректер мен арнайы түсірілген видео жіберілген. Ақыры өңірден үздік шығып, республикалық байқауға жолдама алған. Биыл онлайн түрде өткен байқаудың ерекшелігі – 17 облыстан қатысқан 17 отбасының бәрі лауреат атанып, бірдей деңгейде бағаланған. Олардың бәрі 10 қыркүйекте Президент әкімшілігі хатшылығымен онлайн түрде тікелей эфирге қосылып, жеңімпаздарды марапаттау рәсімі сол кезде өткізілген. Барлық отбасылар ҚР Президенті атынан Дипломға және бағалы сыйлықтарға ие болған.