Ақтаудағы болашақ теміржолшылар өндірістік тәжірибеден өтіп жүр

М.Тынышпаев атындағы Қазақ көлік және коммуникациялар академиясының Ақтау көлік колледжінде білім алатын болашақ теміржолшылар теориялық білімін тәжірибемен ұштастыруда. Колледж студенттері Маңғыстау теміржолы мекемелерінде оқу-өндірістік тәжірибеден өтіп жатыр. Өткен апта білім орнының теміржол жылжымалы құрамдарын пайдалану, жөндеу және техникалық қызмет көрсету мамандығының екінші курс студенттері колледждің өндірістік оқыту шебері, ардагер-теміржолшы Бақыт Тұрымовтың жетекшілігімен локомотив депосында болып, теміржол көлігінің қыр-сырымен танысты. Шәкірттеріне теориялық білімнің тәжірибеде қалай қолданылатынын көрсетуге бастап келген оқыту шеберінің айтуынша, студенттердің бір тобы Маңғыстау локомотив пайдалану депосында, тағы бір тобы «Қаскортранссервис» жекеменшік компаниясының локомотив депосында тәжірибеден өтуде екен. Ұйымдастырушылардың сөзінше, студенттерге арналған өндірістік сабақтар қазанның 14-не дейін өзге мекемелерде жалғаспақ. Ал болашақ слесарьларды вагон шаруашылығына саяхат, сол жердегі тәжірибелі теміржолшылармен тағылымды кездесу күтуде. – Депоға осы қыркүйекте қырық шақты бала кезек-кезегімен келіп, тәжірибелік сабақ алып кетті. Біз оларға алдымен теміржолшы өз қауіпсіздігін, одан кейін теміржол қозғалысы қауіпсіздігін сақтай отырып жұмыс істеу керектігін үйреттік. Өмірін теміржолмен байланыстыратын әрбір адам мұны міндетті түрде білуі тиіс. Тепловоз жөнінде толық мағлұмат беріп, әрбір бөлшегін жіліктеп тұрып көрсеттік. Тепловозға көтеріліп көруіне мүмкіндік бердік. Темір жол көлігі қалай жүреді, қандай ережелерге бағынады, машинистің міндеті, барлығын тәжірибе түрінде де, лекция барысында да жан-жақты таныстырылды. Екіге бөлініп оқу кабинеттерінде дәріс тыңдады, – дейді Маңғыстау локомотив пайдалану депосының оқыту жөнінде нұсқаушысы Жұмабек Аселов.