Ғасырлық тойға – спорттық тарту

Қызылорда станциясында жай ғана спорттық дода емес, ұрпақтар сабақтастығын жалғаған тағылымды шара – шағын футбол ұйымдастырылды. Теміржолшылардың еске алу турнирі қазақ руханияты мен теміржол саласының мақтанышына айналған құрметті теміржолшы, ақын, аудармашы, тыл және еңбек ардагері Шайхислам Серікбайұлының 100 жылдығына арналды.

Турнирдің ашылу салтанатында «Қазтеміржолкәсіп» ҚБ Қызылорда филиалының төрағасы Бауыржан Ахметов, Қызылорда теміржол ардагерлері кеңесінің төрағасы Марат Шайжан, сондай-ақ Асылбек Серікбаев, Қызылорда электрмен жабдықтау дистанциясының бастығы Алпамыс Саимов, Қызылорда станциясының басшысы Әмірбек Матжанов, сала ардагерлері Нұржауған Досанов пен Есен Тасқынбаев сөз сөйлеп, Шайхислам Серікбайұлының өнегелі өмір жолын тебірене еске алды. Олар жарысқа қатысушы командаларға сәттілік тілеп, мұндай игі шаралардың ұрпақ тәрбиесіндегі орны ерекше екенін атап өтті.

– Біршама уақыттан бері облыс көлемінде, менің әкем-Шайхислам Серікбайұлының 100 жылдығына арналып өткізіліп жатқан шараларға қатысып қолдау білдірген теміржолшыларға алғысым шексіз. Енді Қазалы ауданында өткізілетін үлкен іс-шара жоспарланып отыр. Бүгінгі тағылымы терең бастаманың ұйытқысы болған «Қазтеміржолкәсіп» ҚБ Қызылорда филиалы мен Қызылорда теміржол ардагерлері кеңесі. Бұл екі ұйымның бірлескен жұмысы теміржолшылардың бірлігі мен рухани тұтастығын айқындайтын маңызды қадам болды, – деп әріптестеріне алғыс білдірді Асылбек Серікбаев.

Жеребе бойынша қарсыластары анықталған командалар арасындағы тартысты ойындар қыза түсті. Алайда бұл додадағы басты мақсат жеңіс емес, тұлғаға тағзым, ардагерлерге құрмет, теміржолшылар арасындағы бірлік пен ынтымақты нығайту.

Бұл турнир теміржол саласының тек өндірістік қуатын ғана емес, рухани әлеуетін де айқындайтын жарқын көрініс.

Шын мәнінде Ардагерлер кеңесі өткеннің өнегесін жаңғыртса, «Қазтеміржолкәсіп» ҚБ сол игі істің нақты тірегіне айналып, теміржолшыларға қызықты спорт сайысының өтуіне қолдаушы және ұйымдастырушы болды.

Өзіндік қызығы мен тартысты таласқа толы, тосын жағдайсыз 10 ойын өткізген командалар арасынан  жүлдегерлер анықталды.

– 3-орынды Қызылорда магистральдық желі бөлімшесінің «НЖС-10» командасы иемденді. Жеңімпазға сәл ған есе жіберген Қызылорда белгі беру және байланыс дистанциясының «ШЧ-39» құрамасы 2-орын алды. Ал, 1-орынды қарсыластарының бәрінен бәсі басым түскен Қызылорда локомотив пайдалану депосының «ТЧЭ-34» командасының машинистері қанжығаларына байлады. Жүлдегерлердің барлығына кәсіподақ ұйымы атынан бағалы сыйлықтар, диплом табысталды, – деді спорт инспекторы Бақытжан Имбергенов.

Ойынның үздік қорғаушысы «ЭЧ-25» командасының ойыншысы Бейбіт Каменов атанды, үздік қақпашы болып «ШЧ-39» командасынан Нұрлыбек Дәулетов таңдалды. Үздік ойыншы Нұрлыбек Көбеков (ТЧЭ-34), үздік шабуылшы аталымы «ДС Кызылорда» командасынығ ойыншысы Дастан Құрманғазиевқа тапсырылды.