«ҚТЖ» командасы «Самұрық-Қазына» спартакиадасында киберспорттан чемпион атанды
Астанада өткен XI республикалық «Самұрық-Қазына» спартакиадасында «ҚТЖ» ҰК» АҚ киберспортшылары топ жарып, чемпион атанды, деп хабарлайды Rail-news.kz.
Спартакиаданың заманауи әрі жоғары бәсекелестікке толы спорт түрлерінің бірі саналатын киберспорт додасына еліміздің әр өңірінен үздік ІТ-мамандар мен геймерлер қатысты.
Турнир барысында «ҚТЖ» командасы жоғары деңгейдегі командалық үйлесімділік пен жылдам реакция танытып, тактикалық шеберлігін көрсетті. Ойыншылар әр кезеңде темірдей тәртіп пен өзара түсіністікті сақтап, қарсыластарынан басым түсті.
Нәтижесінде теміржолшылардың киберспорттағы командасы «Самұрық-Қазына» спартакиадасының жеңімпазы атанып, «ҚТЖ» ҰК» АҚ қоржынына кезекті алтын медальді қосты.
Бұл жетістік теміржол саласы қызметкерлерінің тек дәстүрлі спорт түрлерінде ғана емес, цифрлық спорт бағытында да жоғары бәсекеге қабілетті екенін көрсетті.