ҚТЖ футзалшылары «Самұрық-Қазына» спартакиадасында қола медаль жеңіп алды
Футзалдан «ҚТЖ» ҰК» АҚ құрама командасы «Самұрық-Қазына» АҚ компаниялар тобының XI республикалық спартакиадасында жүлделі үшінші орынға ие болды, деп хабарлайды Rail-news.kz.
Қола медаль үшін өткен шешуші кездесуде теміржолшылар «KEGOC» АҚ командасымен күш сынасты. Матч барысында ҚТЖ ойыншылары алаңдағы бастаманы бірден өз қолдарына алып, шабуылда да, қорғаныста да жоғары деңгейдегі шеберлік танытты.
Жылдам шабуылдар мен үйлесімді қорғаныс нәтижесінде теміржолшылар қарсылас қақпасына бес гол соғып, өз қақпасына бірде-бір гол жібермеді. Қорытынды есеп 5:0 болды.
Осылайша, ҚТЖ құрамасы «Самұрық-Қазына» спартакиадасының футзал турнирін қола медальмен аяқтады. Жеңіс теміржолшылардың командалық бірлігі мен спорттық дайындығының жоғары деңгейін тағы бір мәрте көрсетті.