Белкөл станциясының басты байлығы
Қызылорда облысы бойынша меншікті тілші
Жүк түсіру-тиеу, құжат рәсімдеу, тіркеу, вагон жеткізіп беру, құрамдарды бір- бірінен ажыратып, құрастыру секілді таусылмайтын жұмыстар кез келген станцияда қызу жүріп жатады. Біздің жолымыз түскен Белкөл станциясында да үйреншікті көрініске куә болдық.
Белкөл станциясы бастығының логистика жөніндегі орынбасары Ғабит Тлеубаевтың мәліметінгше, биылғы жеті айда пойыздардың қозғалыс қауіпсіздігінің бұзылу жағдайы орын алмаған. Жүк және коммерциялық жұмыстар бойынша жарамсыздық жағдайы тіркелмеген. Өндірістік жұмыстар кезінде вагонның кешіктірілуі, транзитті вагондардағы қауіпті жүктердің зақымданып, вагоннан ағытылу жағдайы да болмаған.
– Жеті айда тиісті деңгейге жеткізілмей қалған көрсеткіштер алдағы уақытта толықтырылатын болады деп ойлаймыз. Өйткені жүк тасымалына байланысты жоспарлы көрсеткіштің кемшін түсіп жатқаны болса, ол біздің қызметімізге немесе теміржолшылардың жұмысына байланысты емес. Бізде өз кәсібін игерген нағыз мамандар еңбек ететді. Кенжебек Малғайдаров пен Болат Махашов, парк кезекшілері Әлібек Тәжібаев пен Жасұлан Аптықалықов, тауар кассирі Гүлайым Сүлейменова, жүк қабылдап-тапсырушы Мөлдір Оралова, тасымал құжаттарын өңдеу операторы Айбек Айшықов, станция кезекшілері Гүлмира Жүнісова мен Бақытжан Назаровтар өндірістік жұмыстардың сапалы орындалуына басымдық беретін біздің ең таңдаулы, тәжірибелі қызметкерлеріміз, – деді станция бастығының орынбасары Ғабит Тлеубаев.
Айтса айтқандай, белкөлдіктер бағындырған биік көз тартарлық. Негізгі өндірістік көрсеткіштер 96-126 пайыз аралығында орындалған. Жалпы бекеттегі тасымалдау жұмыстары кезінде технологиялық талаптар, техникалық және еңбек қауіпсіздігі қағидалары толық сақталып жұмыс жасалады. Әрбір станциялық өзіне бекітілген міндетті кәсіби деңгейде орындауға дағдыланған. Демек, «Белкөлдің басты байлығы – адамдары» деген станция басшысының тұжырымымен біз де келісеміз.