Wabtec – сенімді серіктес

Премьер-министр Олжас Бектенов Инвестициялық ахуалды жақсарту жөніндегі кеңестің отырысын өткізді. Жиында шетелдік инвесторлармен ынтымақтастықты кеңейту, ұзақ мерзімді капиталды, технологияларды және үздік халықаралық тәжірибелерді тарту, бизнес үшін ашық және болжамды орта қалыптастыру мәселелеріне назар аударылды.

Қазақстан америкалық «Wabtec Corporation» холдингінің өңірдегі өндірістік серіктестері арасында көлемі бойынша екінші орында тұр. Кәсіпорынның өндірістік қуаты жылына 100 теміржол техникасын құрайды. ҚТЖ-мен әріптестік шеңберінде локомотивтер мен дизельді қозғалтқыштарды шығаруды одан әрі ұлғайту жоспарлануда. Қазақстанда теміржол инфрақұрылымын дамыту, «осал тұстарды» жою бойынша жүргізіліп жатқан ауқымды жұмыстарды ескере отырып, локомотив паркін жаңарту және өндірістік қуатты кеңейту елдің транзиттік әлеуеті мен өткізу қабілетіне серпін береді. Кеңесте Wabtec компаниясының ТМД және Моңғолия елдерінде далалық сервистер және техникалық қызмет көрсетуді басқару жөніндегі вице-президент Ғайни Дүйсенова Қазақстан ТМД өңірінде және жаһандық деңгейде Wabtec корпорациясының негізгі серіктесі мәртебесін бекіткенін мәлімдеді. Ынтымақтастық жылдары Қазақстанда 700-ден астам локомотив шығарылған. Бүгінде олар тек Қазақстанда ғана емес, бүкіл Орталық Азияда тасымалдауды қамтамасыз етеді.

– Біздің зауытта Қазақстанда пайдаланылатын локомотивтер паркінің 50%-ның қозғалтқышына күрделі жөндеу жүргізілді. Енді зауытта жаңа дизельді қозғалтқыштар да шығарылатын болады. Осылайша, Қазақстан бүкіл ТМД өңірінде және әлем бойынша Wabtec компаниясының өндіріс бойынша екінші ірі серіктесі болмақ, – деп атап өтті Ғайни Дүйсенова.  

Қазақстан көлік инфрақұрылымын жоспарлы түрде жаңартуды, соның ішінде «C5+1» бойынша қол жеткізілген уағдаластықтар шеңберінде де жалғастыруда. Ынтымақтастықтың негізгі бағыты – теміржол және авиация салаларындағы ірі жобалар үшін қаржыландыруды тарту.