Испанияда үш күнде екі мәрте теміржол апаты болды
Барселона маңында Rodalies компаниясына тиесілі пойыз рельстен шығып кетті. Апат салдарынан машинист қаза тауып, кем дегенде 15 адам жарақат алған, деп хабарлайды Rail-news.kz.
Жергілікті БАҚ-тың хабарлауынша, оқиға Желида және Сан-Садурни-д’Анойя қалаларының арасындағы теміржол телімінде орын алған.
Апатқа теміржолға тіреуіш қабырғаның құлап қалуы себеп болған: жоғары жылдамдықпен келе жатқан пойыз оған соғылып, соққыдан кейін құрам рельстен шығып кеткен.
Шұғыл көмек қызметтері зардап шеккендердің жақын маңдағы ауруханаларға жеткізілгенін мәлімдеді. Кейбір жараланғандардың жағдайы орташа ауыр деп бағалануда.
Бұл қайғылы жағдай Испанияның солтүстік-шығысында соңғы күндері туындаған қолайсыз ауа райы кезінде болды. Қазіргі уақытта елдің бірқатар аймағында жоғары дайындық режимі жарияланған. Дауылды ауа райы елдің шығысы мен солтүстік-батысындағы жағалауларды, Пиреней таулы жүйесін (онда қалың қар жауған) және Менорка аралын шарпыды. Арал маңында биіктігі бірнеше метрге жететін алып толқындар тіркелді.
Айта кетсек, 19 қаңтарда Адамус қаласында екі жүйрдек пойыздың соқтығысуы салдарынан 40-тан астам адам қаза тапқан еді.