Бішкек «Қытай – Қырғызстан – Өзбекстан» теміржол жобасына Қытайдан 305 млн доллар алады

Қытай тарапы «Қытай – Қырғызстан – Өзбекстан» теміржол құрылысы жобасындағы Қырғызстанның үлесін қаржыландыру үшін 2,075 млрд юань (305 млн доллар) көлемінде қаражат бөлетінін Қырғызстан Жогорку Кенеші мәлімдеді, деп хабарлайды Rail-news.kz.

Бөлінген соманың 35%-ы (0,725 млрд юань немесе 107 млн доллар) грант ретінде беріледі. Қалған 1,35 млрд юань (198 млн доллар) 1,5% жылдық мөлшерлемемен 25 жыл мерзімге несие түрінде ұсынылады. Бұл несие бойынша 5 жылдық жеңілдікті кезең қарастырылған.

Айта кетейік, «Қытай – Қырғызстан – Өзбекстан» теміржолының құрылысы 2024 жылғы 27 желтоқсанда басталды.

Жобаның жалпы ұзындығы шамамен 533 шақырымды құрайды, оның 305 шақырымы Қырғызстан аумағынан өтеді. Жобаның жалпы құны 5 млрд долларға бағаланып отыр, оның 4,7 млрд доллары қырғыз учаскесінің құрылысына жұмсалмақ.

Теміржолдың техникалық сипаттамасына келер болсақ: «Торугарт – Мақмал» учаскесінде (160 шақырым) 1435 мм ендігі жол, ал «Мақмал – Жалал-Абад» учаскесінде (145 шақырым) 1520 мм ендігі жол салынады.