Ресей арқылы өтетін Қазақстанның экспорттық тасымалы 4%-ға өскен
«Қазақстан темір жолшысы» газетінің тілшісі
Қазақстанның экспорттық жүк тасымалының 70 пайызға жуығы Ресей темір жолдары арқылы жүзеге асуда. Яғни Ресей үшінші елдерге жүк тасымалдаудың негізгі бағыты болып отыр. Аталған бағыт бойынша экспорттық жүкті тасымалдауда өсім 4 пайызды құраған.
Ресей арқылы Қазақстаннан экспорттық тасымал Швейцария, Түркия, БАӘ, Польша, Кипрға артса, Украинаға керісінше тоқтаған. Жалпы, өткен жылы Ресей аумағы арқылы теміржол көлігімен көмір, мұнай өнімдері, бидай, астық экспорты ұлғайып, қара металл, химиялық жүк, түсті металдар мен тыңайтқыштар тасымалы кеміген.
Есесіне, Ресей арқылы үшінші елдерден Қазақстанға импорттық тасымал көлемі 5 пайызға өскен. Бұл өсімге түсті кен, қара металл, мұнай өнімдері, қант өнімі, ағаш бұйымдарының көптеп келуі әсер еткен.
Мамандар былтыр Транскаспий халықаралық көлік бағдары арқылы да экспорттық жүк тасымалы көлемінің 2021 жылға қарағанда, 6,6 есе өскенін айтады. Әсіресе қара және түсті металдар, химиялық жүктердің сыртқа шығарылуы жоғарылаған. Ал ТХКБ бағдары бойынша импорттық тасымалдарға келсек, бұл бағытта да оң динамика сақталып, өсім 83% құраған. Бұл арада химиялық жүктер, мұнай өнімдері, қара металдар, азықтүлік жүктеріне қатысты жеткізілімнің өскені белгілі болған. Сонымен қатар 2022 жылы отандық экспорттаушылар Қазақстанның Болашақ станциясы арқылы өтетін «Солтүстік-Оңтүстік» халықаралық көлік дәлізінің шығыс бағытын белсенді пайдалана бастаған. Нәтижесінде былтыр Болашақ шекаралық өткелі арқылы Қазақстаннан Иранға экспорт 8,5 есе өскен.