Жыл басынан бері ҚТЖ арқылы 61,5 млн тонна жүк тасымалданды
Үстіміздегі жылдың алғашқы тоқсаны қорытындыланды. Өткен үш айда Қазақстан темір жолы арқылы 61,5 миллион тоннадан астам жүк тасымалданған. Соның 39,3 млн тоннасы еліміздің ішінде тасымалданса, 22,2 млн тоннасы экспортқа шығарылған.
Сонымен қатар, тарифтік жүк айналымының өткен жылдың есепті мерзімімен салыстырғанда 7% артып, 64,4 млрд тонно-км құрағаны белгілі болып отыр. Қазақстан арқылы өтетін транзиттік жүк тасымалының да жылдан-жылға қарқын алып келе жатқаны байқалады. Бұл бағыттағы өсім алғашқы үш айда 34,3% құрап отыр. Сала мамандары оған логистиканы өзгерту және тасымал қашықтығын арттыру арқасында қол жеткізіліп отырғанын айтады.
«Қазақстан темір жолы» ұлттық компаниясы әдеттегідей, әлеуметтік маңызға ие жүктер болып саналатын көмір мен астық тасымалын ерекше бақылауда ұстап отыр. Биылғы қаңтар-наурыз аралығында теміржол көлігіне 28,5 млн тонна тас көмір тиеліп, соның 20,3 млн тоннасы қазақстандық тұтынушыларға жеткізілген. Ал 8,2 млн тонна қатты отын сыртқы елдердің сұранысын қанағаттандыру мақсатында экспортталған. Қазақстан темір жолында көмір разрездерін вагондармен қамтамасыз ету, оларды уақытылы беру және көмір тиелімін қамтамасыз ету бойынша мониторингілеу топтары мен жедел штабтар жұмысы тиімді ұйымдастырылып, табысты жұмыс істеуде.
Ал әлеуметтік жүктің келесі түрі – астық тиеліміне келсек, ағымдағы жылдың алғашқы тоқсанында 3 млн тоннаға жуық астық тиеліп, бұл өткен жылдың көрсеткішінен 10,2% жоғары шыққан. Сонымен қатар тартылған астық өнімдері тасымалы да 20,7% артып, 879 мың тонна шамасын құраған. Аталған жүк түріне қатысты экспорттың да 39,3% өсіп, 665 мың тонна шамасын төңіректегені белгілі болып отыр.
Жүк тасымалын ұйымдастырушы мамандар алға тартқан деректер, осы жылдың бірінші тоқсанында химиялық тыңайтқыштардың 12,8% немесе 1,1 млн тоннаға, мұнай жүктерінің 5% немесе 4,5 млн тоннаға, ал құрылыс жүктерінің 15% немесе 2,6 млн тоннаға өскенін көрсетіп отыр.
Ал экспорттық бағытта түсті кен және күкірт қышқылы, мұнай жүктері, химиялық тыңайтқыштар, құрылыс жүктері тасымалының ұлғайғаны байқалады.
ҚТЖ инфрақұрылымының осындай жүктемесіне қарамастан басымдыққа ие міндеттемелер уақытылы орындалып отырғанын осы көрсеткіштер айғақтайды. Демек, алғашқы үш айды табысқа толы тоқсан болды деп қорытындылауға болады.