Қытай-Еуропа бағыты бойынша Қазақстан арқылы 70 мыңнан астам жүк пойызы өткен
2013 жылдан бері 10 жыл ішінде Алашанькоу (Қытай) – Достық (Қазақстан) шекаралық өткелі арқылы 36 600-ден астам пойыз, ал 2016 жылдан бері Қорғас құрғақ порты арқылы Еуропа елдеріне және қарама-қарсы бағытта жүктері бар 33 400-ден астам пойыз өтті. Мұндай статистиканы Синьхуа агенттігі келтірді.
Бүгінгі таңда екі шекаралық өткел де 200 санаттағы жүктері бар Қытай-Еуропа және Еуропа-Қытай пойыздарының жалпы санының жартысынан көбі өтеді. Қытайдың өнеркәсіп орталықтарын Еуропаның 25 және 18 еліндегі сауда серіктестерімен байланыстыратын «Алашанькоу-Достық» шекара өткелі арқылы 115 бағыт, ал Қорғас-Алтынкөл арқылы 80 бағыт бар.
Трансшекаралық тасымалдаудың тиімділігін арттыру мақсатында Қытай шекаралық станциялардың өткізу қабілетін арттыру шараларымен қатар технологиялық процестерді оңтайландыруда. Нәтижесінде 2023 жылға қарай осы шекара өткелдерінде бір пойызды өңдеу уақыты 12 сағаттан 6–8 сағатқа дейін қысқартылды. Сонымен қатар Қазақстан өзінің транзиттік әлеуетін арттыруға бағытталған бірқатар жобаларды жүзеге асыруда, оның ішінде Қытаймен өткелдегі шекаралық өткізу қабілетін де арттыруда. Үшінші Бақты-Чугучак теміржол өткелі салынуда, ол Қытай-Қазақстан шекарасындағы пойыз өткізу пункттерінің жалпы өңдеу қуатын жылына 28-ден 48 миллион тоннаға дейін ұлғайтуға мүмкіндік береді.
Айта кетсек, Мемлекет басшысы Қасым-Жомарт Тоқаев көлік-логистикалық әлеуетті дамытуды Үкімет жұмысының негізгі басымдықтарының бірі ретінде белгілеген болатын.
«Қазір әлемде жаңа экономикалық кеңістік қалыптасып жатыр. Қытайдан Еуропаға, Ресейге, Орталық Азияға және осы аймақтардан Қытайға жіберілетін тауар көлемі айтарлықтай көбейеді деген болжам бар. Қазақстан солтүстік пен оңтүстікті, батыс пен шығысты байланыстыратын жаһандық жолайрықта орналасқан. Бұл біздің елімізге зор мүмкіндік беріп отыр. Сондықтан көлік-логистика саласы экономикамызды алға бастайтын басты күштің біріне айналуға тиіс», — деді ел Президенті халыққа Жолдауында.
Еліміз Қытайдан Еуропаға бет алған жүк тасқынын арттыру бағытында инфрақұрылымды жақсартуға басымдық беріп отыр. Атап айтқанда, 2023 жылдың қараша айында Алматы торабын айналып өтетін (74 км) және Дарбаза – Мақтаарал (152 км) теміржол желілерінің құрылысы басталды. Біріншісі жүктерді жеткізу мерзімін 24 сағатқа қысқартып, Алматы теміржол торабын 40%-ға жеңілдетсе, екіншісі Орталық Азия бағытында өткізу қабілетін 10 млн тоннаға арттырады.
Бұдан бөлек, желтоқсанда ұзындығы 272 шақырым болатын Бақты – Аягөз теміржол желісінің құрылысы басталды. Бұл жобаны жүзеге асыру Қазақстан мен Қытай арасындағы жүк айналымын қосымша 20 млн тоннаға арттыруға мүмкіндік береді.
Жалпы алдағы үш жылда республикада 1 300 шақырымнан астам жаңа теміржол салынады деп жоспарланып отыр.