Вагонмен келіп, кемеге тиелетін астықты қабылдау терминалдарының дайындығы қалай?

Маңғыстауда өткен алты айда астық тасымалы былтырғыға қарағанда қарқынды. Өзге өңірлерде осы жылғы егінге орақ салынып, қамбаға жиналып жатса, түбектік теміржолшылар әлі өткен жылдың жиын-терімін тасымалдап, жөнелтуде. Бұл өңірдегі астық тасымалы науқаны ұзарып, соның есебінен жүк көлемі артып отыр. Қазір түбектегі төрт терминал жаңа өнімді қабылдауға сақадай сай. Өңірде «Ақтау сол- түстік теңіз», «АқБидай», «Caspian Global» және жеке «Сауқымбек» ЖШС терминалдары бар. «АқБидай», «Ақтау солтүстік теңіз», «Caspian Global» ауыстырып тиеумен айналысады. Ақтау портына келген жүк терминалға түсіріліп, әрі қарай кемеге тиеледі. Онан әрі жүк теңізбен шет елдерге жөнелтіледі. Жылдың бірінші жартысында осы «АқБидай» және «Солтүстік» терминалынан ауыстырылып тиеліп 196 кеме немесе 773 мың тонна бидай мен арпа теңіз асқан. Көрсеткіш былтырғы салыстырмалы мерзімдегіден едәуір өскен. Өткен жылғы бірінші жартыжылдықта 181 кемемен 718 мың тонна бидай жіберілген екен. Оған қоса түбекке жеткен тағы 37 вагон – 9 мың тонна бидай «Caspian Global» терминалы арқылы жөнелтілген. Ал «Сауқымбек» ЖШС болса, ол тек өңірге келіп жатқан астықты қабылдайды. Онда межедегі мерзім ішінде 56 вагон – 4 000 тонна астық түсірілген. Бұл терминал оны ұн, макарон өнімдерін шығару мақсатында қолданады. − Өңірде астықты транзиттік бағытта ауыстырып тиеу үдерісі жақсарып, көрсеткіш артып келеді. Бұрындары Түркіменстанға Өзбекстан теміржолы арқылы жіберілетін. Болашақ станциясы ашылғалы ол үдеріс өзгерді, тікелей өзіміз жөнелтеміз. Мәселен, биылғы екі тоқсан ішінде Түркіменстанға Болашақ теміржолымен 920 жабық, 1503 астық вагоны тапсырылды. Оның ішінде бидай 2403 вагон немесе 160 мың тоннаны құрады. Соңғы уақыттары өзіміздің облыста пайдалану мақсатында келетін астық өнімдерінің көлемі де көбейіп отыр. Астық өнімі – бидай ұнын алатын болсақ, бірінші жартыжылдықта Маңғыстау станциясына 36 вагон – 2080 тон- на, Ақтау портына 186 вагон немесе 10800 тонна түсірілді. Cондай-ақ Ақтау портына арпа ұнынан да 136 тонна келді. Мұндай жүктер Өзен станциясына да жеткізіліп отыр. Өткен алты айда бұл станцияға 54 вагон, Бейнеу станциясына 27 тонна бидай ұны келді. Осы аталғандардың барлығы – 2020 жылдың астығы. Әдетте мұндай тасымал қыркүйекте басталып, мамыр, маусым айларында тоқтайтын еді. Биыл ұзаққа созылып, жалғасып жатыр. Десек те, осы жылғы егіннің де теміржолмен экспортталуына дайын отырмыз. Элеватордың бәрі астықты қабылдап, жаңа науқанды бастауға әзір. Төрт элеватордың да дайындығын алдық. Жөндеуден өткен. Қазір екі терминалда профилактикалық жұмыстар жүргізілуде. Осы жылғы астықтың тасымалы қыркүйек-қазан айларында басталады деп күтудеміз, – дейді Ақтөбе жүк тасымалы бөлімшесі Маңғыстау қосалқы бөлімшесінің логистика бөлімі бастығы Айбек Утеков. Логистика бөлімі бастығының айтуынша, түбек теміржолына жеткен астықтың шашылып төгілмей, бұзылмай сақталып, теңіз жағалауы елдеріне жөнелтілуіне Маңғыстауда барлық жағдай ойластырылған. Теміржолшылар әдеттегідей өз міндетін орындаса, «АқБидай», солтүстік терминалдарында сақтау орындары мен құрғату мүмкіндіктері қарастырылған. «АқБидай» сыйымдылығы 22,5 мың тонна болса, Ақтау солтүстік теңіз терминалында бұл көрсеткіш – 60 мың тонна, «Caspian Global» – 10 мың тонна.