Шу машиналандырылған жол дистанциясы сапалы техникалармен қамтылған
Тараз қаласы бойынша меншікті тілші
Шу машиналандырылған жол дистанциясы – аймақтағы ең ірі теміржол мекемелерінің бірі. 2006 жылы құрылған дистанцияда темір жолдарды жөндеу жұмыстарын жүргізетін өнімділігі жоғары жол техникаларының барлық түрі бар.
Бүгінде дистанцияда 63 жол машинасы жұмыс істеп тұр. Оның ішінде 29 техника австриялық, 14 машина – француздың «Жейсмар» кампаниясының өнімі, 20 техника Ресейден алынған. Қазіргі кезде бес өндірістік телімге бөлінген дистанциядағы қызметкерлер саны 435 адамды құрайды.
Машиналандырылған дистанциядағы бай техникалық базаның арқасында темір жол телімдеріндегі бұрын қолмен атқарылып келген жұмыстар жеңілдетілген, ВПР, ПРБ, ЩОМ секілді күрделі жол машиналарымен жасалған орташа және күрделі жөндеу жұмыстарынан соң жол сапасы анағұрлым жақсара түседі. Техника жұмыс тиімділігін де арттырып, ол өз кезегінде үнемге әсер етеді.
Шу машиналандырылған жол дистанциясының директоры Пернебек Өткелбаевтың айтуынша, жол машиналарында Австрияның Линц қаласында орналасқан «PLASSER-THEURER» заводында оқып келген білікті мамандар жұмыс істейді. Ресейден жеткізілген техникаларды игеру үшін де арнайы курстарда білім алған.
– Шет мемлекеттермен қатар, жұмысшыларымыз өз еліміздегі біліктілікті арттыру орталықтарында тұрақты білімдерін көтереді. Сонымен қатар, өз арамыздағы тәжірибелі мамандар мектебі де осал емес. Машинист-нұсқаушы Ілес Сапаков, оқыту шебері Мәди Серіков, RM 80 №405 жол машинасының бастығы Ян Тодавянский сынды майталман мамандар жастарды үйретуден, жұмысқа баулудан ешқашан бас тартқан емес, – дейді дистанция директоры.
Дистанцияның өндірістік-техникалық бөлімінің бастығы Ерлан Сайлауов жол техникаларының жұмысы туралы сағаттап айтуға бар.
– РМ техникасы жол жөндеу жұмысын бастауға негіз салып, жол асты шағыл тастарын тазалап қайта төсесе, МФС машиналары ластанған тастарды шығарып тастайды. Ал «ДУОМАТ» техникасы төселген жолдың астына қиыршық тасты өлшемге сай етіп енгізеді, белгілі салмақпен көтермелей ұрып нығыздайды және рельс үстінен өтетін ауыр салмақтың қауіпсіздігін қамтамасыз етеді. ДГС техникасы жолдың жинақылығын қалпына келтіріп шықса, ең соңынан ПБР жол көлігі қорытынды тазалау жұмыстарын жүргізеді.Орташа жөндеу жұмысында тиісті көлемде шпал салынады, жол шегелері қағылады, сынған төсемдері ауыстырылады. Жаңа қиыршық тас төселіп, ары қарай жолды көтермелей ұру жұмыстарымен жалғасады. Бұл жұмыстан кейін де жоғарыда аталған техникалар көмекке келеді. Осылайша, жол машиналарының жұмысы нәтижесінде пойыздардың жылдамдығын сағатына 110-140 шақырымға көтеру мүмкін болып отыр, – дейді Ерлан Сайлауов.
Бірнеше рет «Салалық жарыстың жеңімпазы» атағын алған «ҚТЖ» ҰК» АҚ филиалы – Жамбыл магистральдық желі бөлімшесінің Шу машиналандырылған жол дистанциясы биылғы жылды да табысты қорытындылайтындарына сенімді. Ала жаздай тынымсыз істеген техникалар жұмысы күзде тіпті де үдей түскен, тек қыс айларында аз-кем үзіліс болатын көрінеді.