Жолдарды жаңғырту – жауапты мәселе

Теміржол инфрақұрылымын талапқа сай күтіп ұстап, тиісті жөндеу жұмыстарын жүргізіп отыру – олардың қауіпсіз қызметін қамтамасыз ететін негізгі көрсеткіш. Жақында «Магистраль» сарапшылар форумы алаңында теміржол саласының мамандары  «Жолдарды жаңғырту: мәселелері, әлеуеті және болашағы» деген тақырыпта талқылау өткізді.    

Талқылауға «ҚТЖ» ҰК» АҚ Магистральдық желі дирекциясының Жол және құрылыс департаментінің бас менеджері Назар Шамшиденов, дирекцияның Техникалық департаментінің директоры Анатолий Әбдірахманов, тағы басқалар қатысты. Олар Қазақстандағы жол инфрақұрылымын жаңғырту бірқатар маңызды стратегиялық мәселелерді шешу үшін қажет екенін ортаға салды. Атап айтқанда қауіпсіздікті қамтамасыз ету, жолдардың өткізу қабілетін арттыру, жүк құрамдарының жолдағы жүретін уақытын қысқарту, бәсекеге қабілеттілікті күшейту, экономиканы ынталандыру, экологиялық тұрақтылықты қамтамасыз ету, т.т. мәселелерді шешуге септік ететіні сөз болды.  

– 2024 жылы жазғы жол жұмыстарын орындағаннан кейін жолаушылар пойызының жылдамдығын 362,3 км-ге, жүк пойыздарының жылдамдығын 215,4 км-ге, контейнерлік пойыздар жылдамдығын 268,5 км-ге арттыру мүмкін болды. 2023-2028 жылдары ел теміржолында ұзындығы 11 мың км жолға жөндеу жүргізу жоспарланған. Биыл жылдың соңына дейін соның ішінде осы жылға жоспарланған 1400 км жол бойынша жөндеу жұмыстары аяқталады. Сонымен қатар бағыттама бұрмаларын да ауыстыру жұмыстары жүргізілуде, – деп мәлімет келтірді Назар Шамшиденов.  

Сонымен қатар ол жол жөндеудің жаңа әдістері туралы да баяндады. Пойыздардың кешігуіне де осы жөндеу жұмыстары себеп болатынын жасырмады. Ал жөндеу жұмыстары қозғалыс қауіпсіздігін қамтамасыз ету үшін өте маңызды болғандықтан кейбір қолайсыздықтарға қарамастан теміржолшылар оны кестеге сай жүргізуге мүдделі. Сондай-ақ ол пойыздардың кестеден кешігуіне жолға шығып кететін бақылаусыз қалған мал да үлкен «үлес» қосып отырғанын алға тартты. Бұл ретте ол жолшылар тарапынан профилактикалық шаралар, түсіндіру жұмыстары ұдайы жүргізіліп жатқанын, бірақ оның нәтижесі аз екенін айтты. Оған қоса адамдардың белгіленбеген жерден өтуі, өткелдерде көлік жүргізушілерінің рұқсат етілмесе де жолдан өтуге ұмтылуы, т.т. факторлар машинистердің оқыс тежеу жасауына әкеліп, бәрі айналып келгенде қозғалыс жылдамдығына кері әсер ететінін мәлімдеді.  

Ал Анатолий Әбдірахманов қазір теміржолда қысқы маусымда жұмыс істеуге қызу дайындық жүріп жатқанын айтты. Ал жұмыс жоспары қыс түспес бұрын жасалып қойған.    

 – Басты мақсат – теміржолды отын-энергетикалық ресурстармен қамтамасыз ету, қысқы жұмыс киімдерін түгендеу, ғимараттар мен мекемелерді жөндеп, тазалап, дайындау, алғашқы қыстаушыларды қыста жұмыс істеуге оқыту. Бұл жұмыстардың бәрі жылдағыдай өзінің жүйесімен, жоспарлы түрде атқарылды, – дейді А.Әбдірахманов.