Қазақстан мен Қытай жаңа темір жол пунктін ашу мүмкіндігін қарастырып жатыр
«Қазақстан теміржолшысы» газетінің тілшісі
Биыл Қазақстан мен Қытай мемлекеттері арасында дипломатиялық қарым-қатынастың орнағанына 30 жыл. Өткен аптада Қытай басшысының Қазақстанға сапары барысында екі ел арасында түрлі салалардағы ынтымақтастық мәселелері кеңінен сөз болды.
Соның ішінде көлік, әсіресе теміржол саласының дамуына басты назар аударылды. Осы аралықта екі елдің арасындағы транзиттік және құрлық пен теңіздегі мультимодальдық тасымал тұрақты даму үстінде. Екі тарап осы уақыт ішінде 7 порт, мұнай мен газ тасымалдауға арналған 5 трансшекаралық құбыр желісін, 2 трансшекаралық теміржол магистралін және халықаралық шекара маңы ынтымақтастығы орталығын ашты. Биыл бірінші жартыжылдықта Қытай-Еуропа пойыздарының 6 195 пойызы Шыңжаңның екі порты арқылы Қазақстанға өтіп, жаңа рекорд орнатты.
Сондай-ақ, алдағы уақытта қос мемлекеттің «Бір белдеу, бір жол» бірлескен жобасына да жаңа серпін берілетіні мәлім болды. Бұл жоба 2013 жылы Си Цзиньпин Қазақстанға келгенде басталған еді. Сол кезде Қазақстан әлемде «Бір белдеу, бір жол» бастамасын жария еткен бірінші елге айналды.
Қазақстан мен Қытай Еуразия кеңістігінде тиімділігі жоғары және ыңғайлы мультимодальды көлік артериясын құру бойынша белсенді жұмыс істеуде.
– 30 жыл ішінде екі ел арасындағы инфрақұрылымдық өзара байланыс айтарлықтай нығайып, автокөлік, теміржол, авиациялық тасымалдар мен құбыр желісін қамтитын көпвекторлы және мультимодальды инфрақұрылым желісі қалыптасып келеді. Қазіргі уақытта Қытай мен Қазақстан Еуразияның кең-байтақ кеңістігінде тиімділігі жоғары және ыңғайлы мультимодальды көлік артериясын құру бойынша белсенді жұмыс істеуде, – дейді Қытай басшысы «Казахстанская правда» газетінде жарияланған мақалада.
Қос тарап бүгінде жаңа теміржол өткізу пунктін ашу мүмкіндігін белсенді талқылап жатыр. Ляньюньган логистикалық терминалы қазақстандық тауарлар үшін теңізге шығуға жол ашады. Қазақстан арқылы транзитпен өтетін «Қытай – Еуропа» жүк пойыздары жеткізу бағыттарын әртараптандыруға ықпал етеді және жаһандық жеткізу тізбектері мен өндірістердің үздіксіз жүруінде маңызды рөл атқарады.