Солтүстік өңірлік орталық ашылды

2022 жылдың 22 желтоқсанында «ҚТЖ» ҰК» АҚ орталық кеңсесінде Солтүстік аймақ бойынша Пойыздар қозғалысын басқарудың өңірлік орталығы ашылды. Осыған дейін Ақтөбеде – Батыс, Алматыда – Оңтүстік орталықтары ашылған, Солтүстік – үшінші орталық.

Жаңа орталық солтүстік өңірдегі Ақмола, Қарағанды, Қостанай, Павлодар – төрт бөлімшедегі пойыздар қозғалысын басқару қызметін біріктіреді. Орталықтың ашылу салтанатында сөз алған «ҚТЖ» ҰК» АҚ Басқарма төрағасының орынбасары Қанат Әлмағамбетов, Пойыздар қозғалысын өңірлер бойынша бір орталықтан басқару жобасы осымен мәреге жеткенін атап өтті.  

– Біз тұсауын кесіп отырған Солтүстік орталықта жалпы жүк тиелімінің басым бөлігін қамтамасыз ететін негізгі бөлімшелер орналасқан. Ал барлық желі бойындағы жұмыс көрсеткіштері орталық пойыз диспетчерлерінің жұмысына тікелей байланысты болмақ. Олар кең де жарық, барлық жағдайы жасалған ғимаратта жұмыс істеп жатыр. Әрине, Орталықтарды құрумен жұмыс бітпейді. Алда әлі атқарар шаруа көп. Ең басты мақсат – жоғары жұмыс өнімділігі мен тиімділікке қол жеткізу. Осы мақсатта үш орталық бір-бірімен тығыз байланыста Компанияның мүддесі үшін қызмет етеді деген сенімдемін, – деді Ұлттық компания Басқарма төрағасының орынбасары.  

Тасымалдау процесін басқаруды орталықтандыру – станциялардың өткізу қабілетін арттыруға ықпал етіп, пайдалану шығындарын оңтайландыруға, қозғалыс қауіпсіздігін және транзиттік пойыздардың маршруттық жылдамдығын ұлғайтуға мүмкіндік береді. Жобаны іске асыру шеңберінде магистральдық желінің барлық учаскелері «ҚТЖ» ҰК» АҚ мамандары әзірлеген диспетчерлеудің заманауи жүйесімен қамтылған. Желілік-аппараттық залдарда байланыс жабдықтары жаңғыртылып, жылжымалы құрамды бақылаудың және техникалық құжаттаманы жүргізудің автоматтандырылған жүйелері енгізілген.  

– Компанияның орталық әкімшілік ғимаратында жеке блокта орналасқан Солтүстік орталықта жұмыс істеуге төрт бөлімшеден 130-дан астам қызметкер келді. 26 участок бар, бір ауысымда жұмысқа 36 адам шығады. Олар – пойыз және локомотив диспетчері мен ауысым бастықтары. Басты тұлға – пойыз диспетчерлері, олар пойыздардың, бүкіл қозғалысты басқарып, өңірлердегі станция кезекшілерімен тікелей байланыста жұмыс істейді, – деген Солтүстік Орталық бастығы Азамат Бекмағамбетовтің айтуынша, диспетчерлерге екі жыл ішінде тұрғын үйді жалға алу немесе ипотекалық несиемен пәтер алуға қажетті шығындар Компания тарапынан төленеді. Сондай-ақ, көші-қон кезінде де бір жалақы және отбасының әрбір мүшесіне 25% мөлшерінде қаржылық көмек көрсетіледі.