Бакуде Каспий логистикалық форумы өтті

Әзербайжанның астанасы Бакуде «Қара теңіз – Каспий логистикалық форумы 2023: дәліздер, жүктер, инфрақұрылым» тақырыбында Еуропа, Оңтүстік Кавказ және Азияның 20-дан астам елінен делегаттар қатысқан халықаралық конференция және көрме өтті.

Бүгінгі таңда аймақтағы геосаяси жағдайлар мен санкциялар логистикалық компаниялар мен жүк иелерін Қара және Каспий теңізі елдерінің аумақтары арқылы өтетін көлік дәліздерін белсенді пайдалануға мәжбүрлеуде. Бұл динамика жаңа қызметтердің, маршруттардың және инфрақұрылымның дамуына түрткі болуда.  

Бакуде өткен конференция көптеген маңызды тақырыптарды қозғаған бірнеше сессияға бөлінді. Қара және Каспий теңіздері аймақтарындағы халықаралық көлік дәліздері тақырыбында өткен сессияда халықаралық тасымалдау бағдарларының өзгеруіне Ресей-Украина қақтығысының әсері; Транскаспий халықаралық көлік бағытын дамыту мүмкіндіктері (Орта дәліз); Қазақстан арқылы мультимодальды тасымалдауда Еуропа мен Азия арасындағы байланыстарды орнатудағы ТРАСЕКА рөлі; Азия-Еуропа көлік дәліздерінің батыс интермодальдық тораптары; Еуропа –Азия дәліздерінің құқықтық мәселелері: тарифтік саясат, инвестициялық жобалар; электрондық құжат айналымы, Көлік бағдарындағы маңызды буын ретінде Қазақстан арқылы транзит сынды көптеген тақырыптар қатысушылар тарапынан талқыланды.  

«KAZLOGISTICS» Қазақстан көлік қызметкерлері одағының Теңіз және өзен көлігі мәселелері жөніндегі атқарушы директоры Жаслан Жағыпаров осы конференцияда Азиядан Еуропаға мультимодальды жүк тасымалдаудағы Қазақстанның транзиттік әлеуеті тақырыбында баяндама жасады. Ол өз сөзінде елімізде 2030 жылға дейін Қазақстан Республикасының көліктік-логистикалық әлеуетін дамыту тұжырымдамасы бекітіліп, онда бірнеше бағытта атқарылатын шаруалар қарастырылып отырғанын жеткізді. Атап айтқанда, Қазақстан Республикасында жүктерді контейнерлеу және контейнерлік тасымалдау бағдарламасын әзірлеу; Ақтау портында «контейнерлік хаб» салу; Мемлекеттік қолдау шараларын қамтамасыз ете отырып, әмбебап паромдар жасау; Иран, Әзербайжан, Грузия және Түркия порттарында сыртқы терминалдық қондырғыларды құру; Транзит үшін арнайы кедендік және көші-қон режимдері, сондай-ақ шетелдік тасымалдаушылар мен логистикалық компаниялардың жұмысының арнайы ережелері бар еркін сауда аймақтарын құру тұжырымдамада басымдыққа ие дүниелер болып отыр.  

Сонымен қатар тұжырымдама Қазақстан Республикасының аумағы бойынша тауарлардың «біртексіз» қозғалысы үшін цифрлық мультимодальды дәліз құру; Теміржол-теңіз бағытында тасымалды жүзеге асыру кезінде теңіз коносаменті ретінде бірыңғай ЦИМ/ СМГС жүкқұжатын енгізу туралы мәселені пысықтау және кейіннен электронды түрге көшіру; Тұрақты тасымалдау желілерінің кестелері мен тарифтері туралы ақпарат беретін онлайн қызметін іске қосу, сондай-ақ ТРАСЕКА бірыңғай транзиттік рұқсатнама туралы Келісімге Қазақстанның қосылуы сияқты тағысын тағы мәселелер қаралғанын тілге тиек етті. Бұдан кейін ол Қазақстанның ТХКБ-да жетекші рөл ойнайтынын айта келіп, негізгі порттар Ақтау мен Құрықтың, Қазақстанның Шығыс қақпасы саналатын Қорғас құрғақ портының инфрақұрылымдық ерекшеліктеріне тоқталды. Қазақстан көлік қызметкерлері одағының өкілі өз баяндамасының соңында орта дәлізді дамытуға қатысты бірнеше ұсыныстарды ортаға салып, Қазақстанның мультимодальды транзиттік әлеуеті зор екенін және ТХКБ-ны одан әрі дамытуға мүдделі екенін жеткізді.