Өз кәсібінің шебері
Атбасар ауданындағы еңбекші азаматтардың дені нәсібін теміржол бойынан тереді. Осы салаға қатысты ірі кәсіпорындар өңір тұрғындарын жұмыспен қамтып отыр. Соның бірі – Атбасар электровоз жөндеу зауытының қарапайым жұмысшысы, еңбегіне адал майталман маман Ерлан Нығмет, деп жазды Егемен Қазақстан газеті.
2009 жыл. Пойыз түн ортасында бір шағын стансаға сәл іркіліс жасады да, локомотив гудогы бір-екі рет нәумез ысқырып жүріп кетті. Жол жиегіндегі шағын ауылдар қарауытып көрінеді. Біз Атбасар вокзалына келіп тоқтағанда, маңайда адам аз еді, локомотив депосы жақтан екі-үш адам көрінді. Біреуі вагондарды бойлап, бері қарай аяңдап келеді. Ұзын сапты домалақ балғамен темір доңғалақтарды тықылдата соғып қояды. Ерлан Нығмет ағамен біз осылай таныстық. Содан бері еңбек десе ерттеулі аттай дайын тұратын бейнеткеш жанмен тіпті етене жақынбыз. Ерағаң 2008 жылы Қаракөл ауылынан Атбасар қаласына көшіп келіп, «Аждар және К» вагон жөндеу депосына жұмысқа тұрыпты. Содан табан аудармай, осы берекелі ұжымда он үш жыл еңбек етті.
Ел экономикасының қалыпты дамуы үшін іргелі өндіріс орындарының саны артып қана қоймай, өнім сапасы да жақсарып, жұмыс деңгейі жоғарылап отыруы керек. Мұндай таразы басын тең ұстаған игі іс-шаралар екі қолға бір күрек іздеген қарапайым еңбек адамдарын тұрақты жұмыспен қамтамасыз етуге сеп. Осы орайда еліміздің әр аймағындағы кеңес заманында пайдалануға беріліп, кейін 90-жылдарғы топалаң кезінде тоқтап, тоқырап қалған ескі өндіріс ошақтарының кейбірінің қайта түрленіп, жанданып жатқаны көңіл қуантады. Солардың бірі Атбасар ауданындағы «Аждар және К» вагон жөндеу депосы өңірде өркен жайған кәсіпорындардың бірі.
– Өндіріс ошағы бұрынғы вагон жөндеу депосының орнында пайда болған. Кәсіпорын жүк вагондарына қажетті ірілі-ұсақты бөлшектер мен тораптарды дайындауға машықтанған, жүк вагондарын жөндеудің толық циклін қамтиды. Депода әрбір ауысым сайын 7 жүк вагонына жоспарлы жөндеу жүргізілсе, 4-5 вагон күрделі жөндеуден өткізіледі. Осы салада ұзақ жыл жұмыс істеп, мол тәжірибе жинауыма қамқорлық жасаған Аждар Тайшытаев ағамызға алғыс айтамын, – дейді Ерлан Нығмет.
Салыстырмалы түрде айтсақ, елімізде 2010-жылдары небәрі 12 вагон жөндеу кәсіпорны болса, бүгінде олардың саны 30-ға жетіп жығылды. Биыл күзде бұл қатарға тағы бір өндіріс ошағы қосылды. Атбасардағы Локомотив құрастыру зауытының капсуласы салынды. Машина жасау – индустрияландырудың негізгі діңгегі. Өйткені экономиканың өзге бағыттары дәл осы салаға тәуелді. Машина жасау агроөнеркәсіп, энергетика, металлургия, көлік секілді іргелі секторлардың жұмысын жандандырып отыр. Теміржол – осы саланың үлкен бір бөлігі.
– Қазір «Қамқор Локомотив» ЖШС-ның Атбасар электровоз жөндеу зауытында қатардағы жұмысшы болып еңбек етемін. Бір күн толық жұмыс істеп, екі күн демаламыз. Мұнда жұмысқа кіргеніме де екі жылдан асты. Жалақымыз жақсы, уақытында беріледі. Бұған қоса компания тарапынан сауықтыруға ақша төленеді, мерекелерде сыйақы беріп тұрады, – дейді ол.
Осы орайда ауданды алға тартып отырған теміржол кәсіпорындарын атап айтар болсақ, олардың ішінде Атбасар электровоз жөндеу зауыты, «Аждар және К» вагон жөндеу кәсіпорны, «Atbasartehnopark» сервистік серіктестігінің орны бөлек. Қазір бұл кәсіпорындар жүк вагондарының барлық түрін сапалы жөндеп қана қоймай, қажетті бөлшектерді де шығара алатын жағдайға жетті. Міне, осы жетістіктердің бәрінде қарапайым жұмысшылардың айқын қолтаңбасы бар.
Атбасар электровоз жөндеу зауыты қызметкерлерінің айтуынша, уақыт талабына сай болу үшін салаға серпін беретін тың жаңалықтарды үнемі енгізіп отыру керек. Сол мақсатпен алдағы уақытта мұнда вагондарды жөндеудің толық айналымын жүзеге асыру жоспарланып отыр. Атбасардағы деполардың халыққа тигізіп отырған пайдасы зор, өңірдің негізгі экономикалық әлеуетін ұстап тұр деп батыл сеніммен айтуға болады.
«Ерінбеген адамға жұмыс табылады. Әлбетте, қол жұмысының оңайы жоқ. Біздің жұмыс та ауыр еңбекке жатады. Басқа мезгілді айтпағанда, қыстың қыраулы күндері, сақылдаған сары аязда көк темірмен алысу жеңіл жұмыс емес. Бірақ соған сай, өз ризығы бар кәсіп. Бәзбіреулер «қазақтың темір мен техникаға икемі жоқ» деп айтып жатады. Қателеседі. Біздің дархан ұста ата-бабаларымыз да болат балқытып, темір қорытудан кенде болмаған», дейді Е.Нығмет.
Жапондарда бір салада ұзақ жыл тұрақты істейтін мамандарға деген құрмет жоғары болады екен. Кейіпкеріміз Ерлан Нығмет секілді осы салада бұлжымай төр тегіп келе жатқан еңбек адамдары еленгені жөн. Мемлекет басшысы Қ.Тоқаев биылғы Жолдауында келер 2025 жылды «Жұмысшы мамандықтары жылы» деп жариялады. «Осы уақыт ішінде техникалық және кәсіби білім беру жүйесін реформалау қажет. Әрі біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз», деді Президент. Яғни қоғамда еңбекқорлық, кәсібилік сияқты қасиеттер өте жоғары бағаланып, дәріптелуі тиіс.