Жария тыңдауда 2024 жылғы көрсеткіштер мен биылғы міндеттер таныстырылды
«Қазақстан теміржолшысы» газетінің тілшісі
Компанияның бас ғимаратында ҚТЖ қызметі туралы жыл сайынғы жария тыңдау өтті. Жиында Магистральдық желі дирекциясының экономика жөніндегі атқарушы директоры Ерлан Қизатов пен дирекция директорының экономика және қаржы жөніндегі орынбасары Александр Кирович өткен жылғы жұмыстар жөнінде есеп берді.
Жиында алдымен ҚТЖ-ның былтырғы қызметінің нәтижелері мен биылға алған басым міндеттер туралы баяндалды. Соның ішінде компания тарапынан ұсынылатын қызметтер көлемі, былтырғы монополия қызметінің негізгі қаржы-экономикалық көрсеткіштері, тариф сметасын орындау, инвестициялық бағдарламаның атқарылуы, көрсетілген қызметтердің сапасы, реттелетін қызметті тұтынушылармен жүргізілген жұмыстар, даму жоспары, тағысын тағы жайттар сөз болды.
– ҚТЖ табиғи монополия субъектісі ретінде: магистральдық теміржол қызметтерін, кіреберіс жолдар қызметтерін, электр энергиясын тарату қызметтерін көрсетеді. Қазіргі таңда Қазақстан теміржолы желісінің эксплуатациялық ұзындығы 16 008,5 км болса, соның ішінде бір жолды желілер 10 990,6 км құрайды. Электрлендірілген жол ұзындығы 4237,5 км. Мемлекетаралық түйісу нүктелерінің саны – 16. Барлығы 831 станция, 12 магистральдық желі бөлімшесі, 46 ПЧ, 25 ЭЧ, 36 ШЧ, 301 вокзал ғимараты бар, – деп мәлімет берген А.Кирович әрі қарай қаржылық-экономикалық көрсеткіштерге тоқталды.
Көрсетілетін қызметтер сапасын арттыру мақсатында бүгінде компания «ҚТЖ» ҰК» АҚ мен ҚР стратегиялық құжаттар негізінде әзірленген 2023-2029 жылдарға арналған Магистральдық теміржол желісі нысандарын дамыту бағдарламасын басшылыққа алады. Бұл жұмыстар «тар жерлерді» жоюға қатысты және ірі инфрақұрылымдық жобаларды жүзеге асыру арқылы жолдың өткізу қабілетін арттыруды қарастырады, бұл ретте компания қызметкерлерінің денсаулығы мен еңбек қорғау жағдайын және пойыздар қозғалысы қауіпсіздігін қамтамасыз ету бірінші кезекте назарға алынады.
– Негізгі, мақсатты бағдарламаларды орындау аясында Достық – Мойынты телімінде екінші жол салу, Дарбаза – Мақтаарал теміржол құрылысы, Алматы торабында айналма жол желісін салу сияқты теміржолдың өткізу қабілетін арттыруға бағытталған жұмыстар жалғасын табуда. Сонымен қатар 11 станция мен бекеттерде 14 жол қалпына келтірілді. Арыс станциясында жұп дөңесті қалпына келтіру жұмыстары аяқталып, бұл қайта өңдеу деңгейін тәулігіне 3300 вагоннан 5200 вагонға дейін арттыруға септік етті. Сарыағаш станциясында инспекциялық тексеру кешенін айналып өтетін жол құрылысы салынып, бұл өткізу қабілетін тәулігіне 35 жұп пойыздан 40 жұп пойызға дейін көбейтуге ықпал етті. Жиренайғыр, Көктөбе, Алаайғыр станцияларында съездер салу аяқталды. Жол жағдайын жақсарту мақсатында Астана – Қарағанды – Мойынты телімінде RM машиналарымен 97 км жолда өңдеу жұмыстары жүргізілді. 2,3 санаттағы жасанды құрылыстардың 2588 ақауы жойылды. Жол жөндеу бойынша жоспарланған 1401 км болса, нақты 1430 км жол жөнделді, оның ішінде 570 км жол күрделі жөндеуден өтті. Ұзындығы 365 км Қарағанды – Астана – Ерейментау телімінде 2 тартымдық трансформаторды ауыстыру есебімен тартымдық электрмен қамту тұрақтылығы қамтамасыз етілді, – деген баяндамашы атқарылған жұмыстарды түгел тізбектеп өтті.
Сонымен қатар спикер биылғы жылғы міндеттерді де баяндап өтті. Айтуынша, ірі инфрақұрылымдық жобаларды жүзеге асыруды аяқтау, жолдарды, көпірлерді жөндеу және жаңғырту, теміржолшылардың әлеуметтік-тұрмыстық жағдайын жақсарту және еңбекті ұйымдастыру деңгейін арттыру бағдарламасын жүзеге асыру, өндірістік ғимараттарды жөндеу, модульдік үй-жайлар, автокөліктер, кіші механизация, жиһаздар, кеңсе техникаларын және тағы басқа қажеттіліктерді алу, жолдарды қалпына келтіру, жол машиналары кешенін қолдана отырып жолдарды сауықтыру, жөндеу жұмыстарын қарастыратын өндірістік бағдарламаны орындау жұмыстары биыл да жалғасын табатын болады. Жиынға бейнеконференция арқылы онлайн қатысқан сала мамандары баяндамада айтылған деректер бойынша сауалдарын жолдап, дирекцияның қызметі мен қаржылық саясатына қанықты.