Еңбекпен есімі танылған байланыс шебері

Жұмабай Мұқашев – Атырау сигнализация және байланыс дистанциясының сигнал беру, орталықтандыру және блоктау электромеханигі. Оның өнегелі өмірі, бүкіл еңбек жолы еліміздің күретамыры саналатын темір жолмен тығыз байланысты. Қырық үш жыл табан аудармай осы салада байланысшы болып еңбек көрігін қыздыруда.

Жұмекең 1963 жылы маусымда қала маңындағы Талғайраң ауылында дүниеге келген. Мектеп бітірісімен сол кезде жаңадан ашылып жатқан Гурьев теміржол техникумына 1978 жылы оқуға түседі. Бұл оқу орны ширек ғасырға жуық уақыт аймақ теміржолшыларының үлкен бір шоғырын, тұтас бір кезеңнің теміржолшы мамандарын дайындаған оқу ордасы болатын. Болат жолдың барлық саласына қажетті жүздеген теміржолшы мамандар нақ осы техникумнан білім алып қанаттанды. Оны бітіргеннен кейін ғана Алматыға не Ташкентке жоғары білім алуға ұмтылатын. Біздің кейіпкеріміз осы Гурьв теміржол техникумын «Темір жол автоматикасы және телемеханика» мамандығы бойынша 4 жыл оқып бітіріп шығады. 1982 жылы Гурьев сигнал беру және байланыс дистанциясының 17-бекетінің СОБ электромонтері болып жұмысқа орналасты. Одан кейін Отан алдындағы борышын өтеді. Бір қызығы, оның бұл мамандығы әскер қатарында жүргенде де кәдеге асты. Ол Архангельск темір жолында электромеханик болып еңбек етті. Жас маманға бұл үлкен тәжірибе болды. Елге келгеннен соң бұрынғы жұмыс орнына қайта орналасып, қызметін қиындықсыз жалғастырып кетті. Қаным есімді қызбен отбасын құрды.  

Жұмабайдың ата-анасы егін шаруашылығымен айналысқан адамдар еді. Бала кезден олардан егін егу, құс өсіру, басқа да жұмыстарды үйреніп алған ол қолы жұмыстан қалт еткенде үй шаруашылығында осы кәсіптермен айналысатын. Сол қабілеті де пайдаға жарады. Өйткені сол жылдары Атырау сигнализация және байланыс дистанциясының қосалқы шаруашылығы болатын. Онда егін болды, жеміс ағаштары өсті, құс шаруашылығы, жылыжай да болды. Міне, осы жұмыстарды басқаруға агроном боп Жұмабай Мұхамбетұлы тағайындалды. «Ұяда не көрсең, ұшқанда соны ілесің» деп Жұмабай сегіз жылдан аса уақыт шаруашылықты шашыратпай, егінін баптап, құстарды өсіріп, жыл сайын мол өнім беріп отырды. Алайда елдегі жаппай жекешелендіру кезінде бұл шаруашылық та жұмысын тоқтатты.  

Жұмабай бұрынғы жұмысына қайта оралды. Майталман маман өз ісінде озық еді, нәтижесінде 2022 жылы «Кәсібі бойынша үздік» атағына ие болды. Дистанция бастығы Ербол Нұрманов Жұмекеңнің тәжірибесі мол, білім-біліктілігін жастарға үйретіп, бөлісіп жүретін азамат екенін айтады. Жұмекеңнің 4 ұлы бар, олардың арасынан тұңғышы Сағын әке жолын қуып, байланысшы мамандығын таңдапты.