Қарттарым – алтын қазынам
Атырау облысы бойынша меншікті тілші
1 қазан — Қарттар күні мерекесіне орай Атырау жүк тасымалы және магистралдық желі бөлімшелері кәсіподақ ұйымының ұйымдастыруымен «Қарттарым - алтын қазынам» атты іс-шара өтті.
Кездесуге келген қариялар бірі-бірімен сағына көрісіп, құшақтар айқасып, емен-жарқын әңгіме өрбіді. Мереке барысында Атырау теміржолының зейнеткер ардагерлері арнайы көлікпен Махамбет ауданы Сарайшық селосындағы «Хан ордасы - Сарайшық» мемориалды кешені және «Сарайшық» мемлекеттік тарихи-мәдени музей-қорық орталығына сапарлады.
Айта кетелік, бұл орталық туристер мен келушілер үшін барлық жағдай жасалған кешен. Мұнда әкімшілік ғимарат, қонақүй, шаруашылық-тұрмыстық үйі секілді бірнеше ғимарат, экспозициялық-көрме залдары, қор қоймасы, 100-150 орындық мәжіліс-залы, зертханалық және қалпына келтіру үй-жайы, кітап қоймасы мен электронды мәліметтер базасы бар кітапхана орналасқан.
Сарайшық - Алтын Орданың алғашқы сауда орталықтарының бірі болған, кейін Ноғай Ордасының астанасы атанды. 1999 жылы «Хан ордасы – Сарайшық» мемориалды кешені салынды. 1999 жылы мешіт пен осы жерде 7 хан жерленгені туралы естелік тақта орнатылған биіктігі 17 метр кесене тұрғызылды. Қарттар орталықты аралап, музей жәдігерлерін тамашалап, өткен тарихтан көптеген мағлұматтар алды.
Саяхат соңынан қарттарға мейрамхана төрінде дастархан жайылып, мың бұралған би, көңілді күй мен әсем ән орындалды. Мұнда да ақжарма тілектер ақтарылып, бата берілді. Бөлімшеде ардагерлер кеңесі біраз жылдардан бері жұмысын жасап келеді. Сонымен қатар әр мекеменің кадр мамандарынан құралған «Ардагерлер штабы» құрылған. Олар да ардагерлерге жан-жақты қызмет, көмек көрсетумен айналысады. Төраға Х.Айтимовтың айтуынша, бүгінде екі мыңнан астам еңбек ардагері бар. Оларға ұжымдық шартқа сай барлық көмектер беріледі. Қазақ қоғамында аталар мен әжелер – елдік пен өнегелі өмір тәжірибесінің қайнар көзі. Олар қашан да елді береке-бірлікке, ырыс-ынтымаққа жұмылдыра білген. Ортамызда жүрген қарияларымыздың елі, халқы, келешек ұрпағы үшін жасаған игі істері қоғам дамуында ерекше орын алады.