2023 жылы Астана жол дистанциясы бойынша малдың жолға шығуынан 46 рет шұғыл тежеу басылған
«Қазақстан теміржолшысы» газетінің тілшісі
Жолшылар үшін күн тәртібінен түспейтін мәселе – пойыз жолына иесіз жайылған мал шығып кетіп, қозғалыс қауіпсіздігіне кедергі келтіруі. Жол дистанциялары үшін нағыз «бас ауруға» айналып отырған келеңсіздікпен күрес жыл бойы тоқтаусыз жүргізіледі.
Астана жол дистанциясының аумағына қарайтын теміржол бойында да жолға жақын ауылдардың тұрғындары малын далаға емін-еркін жайылуға жіберіп қоя береді. Теміржолдың кез келген жерінен малдың кесіп өтуі жылжымалы құрам үшін қауіпті әрі үлкен шығын екенін қаншама рет айтса да тұрғындар құлақ асар емес. Жол дистанциясы басшылығы ауылдың жергілікті билік өкілдеріне де хатпен шығып, осы мәселені реттеуін сұраған. Бірақ жағдай өзгермеді.
– Қараусыз малдың жолға шығып кетуінің басты себебі теміржол бойында мал жаю ережесінің өрекел бұзылуынан. Соңғы кездері әсіресе ірі қара мал басу оқиғалары жиілеп кетті. Қай-қайсысы да болсын жолаушылар мен жүк пойыздарының қауіпсіздігіне нұқсан келтіріп, адамдар өмірі мен денсаулығына қатер төндіруде. Одан бөлек мал басу кезінде локомотивтерге де зақым келіп, жол төсеміне де залал келтіріледі, – дейді Астана жол дистанциясының бас инженері Төленді Шапшекеев.
Айтуынша, тек Астана жол дистанциясы бойынша ғана 2023 жылы жолға мал шығып кетуіне байланысты локомотивтердің 46 рет оқыс тежеу беруіне тура келген. Соның ішінде 28 оқиғада малды пойыз басқан, 22 малдың иесі табылып, оларға әкімшілік құқықбұзушылық бойынша хаттама толтырылған. Ал қалған 6 малдың иесі табылмаған. Тағы 9 оқиғада пойыз жабайы жануарларды басып кеткен. 9 жағдайда локомотив бригадасы малды баспай оқыс тежеу беріп үлгерген. Мал басу оқиғаларының 36-сы Астана – Бурабай курорты аралығындағы болса, Астана – Жайнақ аралығында 1 оқиға, Астана – Қарағанды арасында 9 жайт болған.
– Теміржолға жақын ауыл тұрғындары арасында мал жаюға байланысты профилактикалық жұмыстарды жаңа жылда да бастадық. Жергілікті әкімдіктердің әлеуметтік желілердегі парақшалары арқылы да оларды көріп, оқып отыратын халыққа малды қараусыз қалдыру салдарының қандай болатыны туралы ақпараттар береміз, – дейді бас инженер.
Сонымен қатар Бурабай – Астана телімінің 273-489 шақырымына, Жайнақ – Астана телімінің 783-805 шақырымына және Қырқыншы – Анар аралығындағы жолдың 507-586 шақырымына жақын елді мекендер мен ондағы жайылым жерлердің, мал шаруашылығы және шаруа қожалықтарының тізімін анықтау ұсынылып отырғанын жеткізді. Және де ветеринарлық қызметке фермерлердің, ауылшаруашылық кәсіпорындарының малын идентификациялауды міндеттеу мәселесі көтерілуде екен. Бұл мал иесін тез анықтау үшін қажет.