Жамбыл өңірінде қыста да қараусыз мал тиылмайды
"Қазақстан теміржолшысы" газетінің Жамбыл облысындағы меншікті тілшісі
Жамбыл өңірінің қысы жайлы. Қар қалың түспеген соң, қыстың күні де төрт түлік малдың қолға қарап қалатын кезі сирек. Күн жылынса, өріске жібереді.
Содан да болар, бұл аймақта тек жер қара, күн жылыда емес, қыста да теміржол бойында мал басу деректері кездеседі. Мысалы, Жамбыл ауданына қарасты Аса ауылында ақпан айында арасына екі күн салып осындай екі жағдай орын алыпты. Біріншісінде Жұма –Тамды бағытының 70 шақырымында сағатына 45 шақырым жылдамдықпен келе жатқан пойыз машинисі жолға шыққан малға байланысты түн ішінде шұғыл тоқтатуға мәжбүр болады.
Ал 27 ақпанда Аса – Жұма бағытының 45 шақырымында сағатына 40 шақырым жылдамдықпен келе жатқан №3488 пойызының машинисі де жолдағы қара малды баспаймын деп тепловозды шұғыл тоқтатады. Өкінішке орай, көп жағдайда пойызды шұғыл тоқтатқанымен, шығыннан қашып құтылу мүмкін болмай жатады. Себебі пойыз дереу тоқтата салатын жеңіл автокөлік емес. Жүк тиеген немесе жолаушылар пойызын кенеттен тоқтату үшін арада 800-1600 метрдей арақашықтық болуы керек. Тежегішті тартқанмен, вагондар инерциямен бірнеше жүздеген метр алға жылжи береді... Темір жолдың қауіпті аймақ саналатыны да сондықтан.
ПЧ-51 Жамбыл дистанциясының қызметкерлері орын алған осындай жағдайларды алға тартып, Аса ауылдық округінің әкімі Б.Қалшынбетовке арнайы хат жолдаған. Қауіп-қатердің алдын алу бағытында бірлесе жұмыс істеуді ұсынды. Жуырда Аса станциясының қызметкерлері теміржол маңында тұратын тұрғындарды жинап, мектепке барып теміржолдан өтер кезде есте сақтайтын ережелерді түсіндіріп, жадынама таратты. Кей кездерде тұрғындардың шойын жолдың үстіне бөгде заттарды қалдырып кетуі пойызды шұғыл тоқтатуға себеп болып, құдай бетін аулақ қылсын, апатты жағдайға соқтыруы мүмкін екенін түсіндірді.
«Бүгінде адамдардың пойыз астына түсіп мерт болып немесе ауыр жарақат алып жатқан жағдайлар аз емес. Жеке қауіпсіздігін сақтамай, тыйым салынған жерлермен теміржолды кесіп өтудің салдары осындай жағдайға әкеліп соғады. Біз, теміржолшылар әскерилендірілген күзет қызметі мен желілік полиция өкілдерімен бірлесіп тұрақты түрде рейдке шығып тұрамыз. Темір жолдың маңында рельстен 5 метрден ары жүру, арнайы жолаушылар өтетін жолды пайдалану, жақындап қалған пойыздың алдын кесіп өтпеу, вагонның немесе автоматты қосқыштың астымен өтпеу, рельстің үстіне отырмау, темір жолға қатты зат тастамау, өтіп бара жатқан пойызға тас лақтырмау керек дегенді айтудай-ақ айтамыз, өкінішке орай, ескертуді елең қылмайтындар көп», – дейді Жамбыл жол дистанциясы № 4 өндірістік бөлімінің бастығы Жанат Тұрғұмбаев.
Жақында осы өндірістік бөлімнің жол шебері Нұрғали Қарғабаев пен техник Данияр Тұрғұмбаев жергілікті бақташылармен кездесіп, теміржол маңына мал жаю ережесін тағы да түсіндірді.