Еңбекті қорғау күніне орай интеллектуалдық сайыс өтті
Маңғыстау облысы бойынша меншікті тілші
Маңғыстау магистральдық желі бөлімшесінде Дүниежүзілік еңбек қорғау күніне орай ұйымдастырылған «Ой-сана» интеллектуалдық ойыны өте мазмұнды да қызықты өтті.
Ойын үш шарттан тұрды. Бірінші сынақта қатысушылар көп ұяшықтардың бірін таңдап, артында жасырылған сауалға жауап берді. Мұнда олар Еңбек кодексі, еңбекті қорғау, алғашқы көмек, арнайы киім, қорғаныс құралдары тақырыптары бойынша білімдерін байқатты. Ойынның келесі кезеңі сұрақ-жауапқа құрылды. Алдын ала дайындалған жиырма сұраққа ия/жоқ деп жауап беріп, жылдам ойлап, әрекет ету мүмкіндіктерін көрсетті. Сайыстың соңғы шартында қатысушылар салаға қатысты сөздердің анықтамасын қиылған қағаздардың арасынан тауып, құрастырды. Бұл уақытпен санасуды, шапшаңдықты және ойлау қабілетін талап етеді.
– Еңбек қорғау күніне орай өткен бұл сайыста шарттардың бәрінен өтіп, жоғары ұпай жинаған Маңғыстау қалпына келтіру пойызы мен Бейнеу теміржол вокзалы ұжымы бірінші орынды өзара бөлісті. Екінші орын Маңғыстау вокзалының, үшінші орын Маңғыстау өрт сөндіру пойызы командасының үлесіне тиді. Жеңімпаздар лайықты марапатқа ие болды, – дейді Маңғыстау магистральдық желі бөлімшесінің жетекші инженер-экологы Фариза Бекболсынова.
