Шымкентте теміржолдағы жазатайым оқиғалардың алдын алу мәселесі талқыланды
«Қазақстан теміржолшысы» газетінің тілшісі
Шымкент магистральдық желі бөлімшесінде бөгде адамдардың қатысуымен болатын қайғылы жағдайлардың алдын алу бойынша үйлестіру кеңесінің шұғыл отырысы өтті.
Бөлімше директорының шұғыл қызметтер жөніндегі бірінші орынбасары Н.Бижановтың төрағалығымен өткен жиынға теміржолшылармен қатар көлік прокурорлары, желілік тәртіп сақшылары, әскери күзетшілер, көліктік бақылау инспекциясы мамандары, жол, белгі беру және байланыс, электрмен қамту дистанциялары, вагон және локомотив пайдалану деполары және басқа да кәсіпорындар өкілдері қатысты.
Күн тәртібінде 2025 жыл бойынша станция жолдарында бөтен азаматтардың жарақаттанушылық жағдайы, станция жолдарын қоршау, ескерту белгілерін қою, халықпен түсіндіру жұмыстарын жүргізу, желілік тәртіп сақшылары және әскерилендірілген күзет қызметімен бірге рейд ұйымдастыру, сонымен қатар бөгде азаматтардың қатысуымен болатын қайғылы жағдайдың алдын алу бойынша міндеттер қаралды.
Қатысушылар тарапынан қоршауларды бұзу және азаматтардың темір жолды рұқсат етілмеген жерден кесіп өтуі мәселесі көтерілді. Темір жолға жақын орналасқан елді мекен тұрғындары қоршауларды әдейі бұзатыны айтылды. Мұндай әрекеттер азаматтардың өміріне және пойыздардың қауіпсіздігіне нұқсан келтіреді. Осы мәселе бойынша қоршаулардың жиі бұзылатын жерін анықтап, тәртіп сақшыларына беруге шешім қабылданды.
Екінші мәселе өткелдерде бейнебақылау орнату туралы болды. Теміржол өткелдеріне ІІД-ның жедел басқару орталығына қосылып тұратын бейнекамералар қою қажеттілігі сөз болды. Бұл шара ЖКҚ бұзушыны анықтауға, рұқсат етілмеген кезде автокөліктердің өтуіне жол бермеуге, төтенше жағдайға жедел жауап қатуға мүмкіндік бермек.
Үшіншіден, жаңадан келген қызметкерлерге тәлімгерлер бекіту жайы көтерілді. Жұмысқа енді қабылданған жұмысшылар арасында өндірістік жарақат алу жағдайын болдырмау үшін олардың әрбірін бейімделгенге дейін тәлімгерге бекіту керектігі айтылды. Сонымен қатар жиында қоршауларды дер кезінде жөндеу, «толаскез» және жол жабылған кезде аса мұқият болу мәселелері де назарға алынды. Айтылған мәселелерді шешу бойынша тиісті тапсырмалар берілді және шаралар қабылданды.