Шұғыл тежелу – үлкен шығын

Семей магистральдық желі бөлімшесінде қозғалыс қауіпсіздігін сақтау бойынша жазғы маусымдағы атқарылуы тиіс іс-шаралар қатары пысықталуда. Соның ішінде жолды күрделі жөндеуден өткізу мен желі бойына қараусыз малдан қорғайтын қоршаулар салу жұмыстары алғашқы кезекте тұр.

Жасыратыны жоқ, пойыздар қозғалысында қараусыз жайылған малдан келер қауіп азаймай тұр. Қазіргі таңда бөлімшеге қарасты желі бойында жолаушылар пойыздары сағатына 120 км жылдамдықпен жүйітки алады. Бір қынжылтары, адамдар мен төрт түліктің кесірінен жолаушылар және жүк пойыздарының шұғыл тежелулері азаймай отыр, әсіресе Семей учаскесінде...

Мәселен, өткен жылы бөгде адамдардың қатысуымен апатты тежеудің жеті оқиғасы тіркеліпті. Соның ішінде екі адам алған жарақаттары салдарынан қаза болды. Сол тәрізді 48 апатты тежеу салдары желі бойындағы шаруашылықтарға тиесілі қараусыз жайылған малдың пойызға соқтығуына алып келген. Нәтижесінде тепловоздар зақымданып, пойыздар кестеден кешіккен. Бұл – әрине елеулі шығын.  

Жалпы, желі бойындағы шұғыл тежелулердің басты себебі адамдардың төрт түліктерін жаю ережелері талаптарын өрескел бұзу болып отыр.  

– Осы орайда Семей магистральдық желі бөлімшесі азаматтардың қауіпсіздігіне ерекше назар аударуда. Сондықтан жазатайым оқиғалардың алдын алу және теміржол қоршауларын орнату үшін жыл сайын жоспарлы іс-шараларды қолға алып, үнемі алдын алу шараларын жүргізуде. Желі бойындағы шұғыл тежеудің алдын алу үшін аудандық, қалалық әкімдіктерге, облыстық білім беру департаментіне, полиция департаментіне және ауыл шаруашылығы департаментіне арнайы хаттар жіберілді. Сонымен қатар ағымдағы жылдың алғашқы екі айында станциялар мен желі бойына таяу орналасқан мектептерде жергілікті тұрғындармен 12 мәрте кездесу өткізілді, – дейді бұл орайда НЖС-6 бөлімшесі жол бөлімінің мамандары.  

Мұнымен қоса теміржолшылар азаматтарға желі бойынан қауіпсіз өту ережелерін түсіндіру үшін жергілікті полиция қызметкерлерімен бірлесіп тоғыз рет рейд өткізіпті. Шаруа қожалықтары иелерімен 20 кездесу ұйымдастырылса, 779 шаруаға теміржол маңында мал жаю ережелері туралы ақпарат берілген.  

Десек те, Дегелең – Жаңа-Семей, Жаңа-Семей – Шар сынды пойыздар жылдамдығы жоғары қумажолдар бойына қоршау салу ісі биылдан бастап қарқын алмақ. Осыған дейінгі бес жыл ішінде жалпы көлемі 229 км ұзындықтағы жолға малдың кіруіне жол бермеу үшін қоршаулар салыныпты. Ал биылғы жылға жолдың қос қапталын қоса алғанда 37 шақырымдық мал қоршауын салу және 410 км қолданыстағы қоршауды күрделі жөндеу жоспарлануда.  

Теміржол өткелдеріндегі апаттардың алдын алу үшін полиция қызметкерлерімен бірлескен патрульдік шаралар да үнемі өткізіліп тұрады. Биылғы жылдың алғашқы екі айында сегіз мәрте рейд жүргізіліп, 626 көлік жүргізуші темір жолдан өту ережелері бойынша ақпараттандырылыпты. Әйтсе де, қынжылтары сол, жергілікті тұрғындар мен шаруашылықтарға жүргізілген түсіндіру жұмыстары күтілген нәтиже бермей отыр. Ал қозғалыс қауіпсіздігіне қойылар талап күшейе түсуде.