Сенат депутаттары «Құрық порты» мен «Ақтау теңіз сауда портына» барды
ҚР Парламент Сенаты Қаржы және бюджет комитеті мүшелерінің Маңғыстау облысына сапары барысында «Ақтау теңіз порты» арнайы экономикалық аймағына жеке инвестиция тарту мәселесі талқыланды, деп хабарлайды Rail-news.kz ҚазАқпаратқа сілтеме жасап.
Жоғары палата депутаттары арнайы экономикалық аймақтардың қызметін жетілдіру тетіктерін зерделеу мақсатында Маңғыстаудағы бірқатар нысанды аралады. Сенаторлар еліміздегі қолайлы инвестициялық ахуалды дамытуға және экспортқа бағдарланған жобаларды іске асыру үшін отандық және шетелдік инвестиция тартуға бағытталған «Ақтау теңіз порты» АЭА-ға арнайы барды. Олар премиум класты газ герметикалық бұрандалы қосылымы бар құбырларды шығару кәсіпорнының жұмысымен, сорғы штангалары мен муфталар өндіру зауытымен, жұмсақ орауыш ыдыстар - үлкен багтар өндіру зауытының жұмысымен танысты. Сондай-ақ Сенат депутаттары жол битумын өндіретін кәсіпорын, «Құрық порты» мен «Ақтау теңіз сауда портына» да аялдады.
«Біздің мұнда келуіміздің мақсаты – арнайы экономикалық аймақ қызметімен танысу, құрылыстың аяқталмауы және инфрақұрылымды жүргізу, өңдеу өнеркәсібіне жеке инвестицияларды тарту деңгейі бойынша мәселелерді талқылау, сондай-ақ арнайы экономикалық аймақтарда қолданыстағы және іске асырылып жатқан жобаларды қарастыру», деді комитет төрағасы Серікбай Трұмов.
Маңғыстау облысына сапарды қорытындылау кезінде комитет мүшелері «Арнайы экономикалық аймақтардың нақты жай-күйі және жұмыс істеуінің алдағы перспективалары» тақырыбында кеңейтілген дөңгелек үстел отырысын өткізді. Кеңес барысында «Ақтау теңіз порты» АЭА қызметінің тиімділігі, арнайы экономикалық аймақтарды одан әрі дамыту, оның ішінде АЭА қызметін реттейтін Қазақстан Республикасының заңнамалық актілеріне енетін өзгерістер мәселелері талқыланды.
«Бүгінгі кеңеске Сенат депутаттары ғана емес, Орталық мемлекеттік органдардың, министрліктердің, атап айтқанда, ұлттық экономика министрлігінің қызметкерлері де қатысты. Мәселелер жан-жақты қаралды, оның ішінде экономикалық жағынан салық шығындары зерделенді және жақын арада бұл мәселені республикалық бюджет комиссиясының қарауына шығару жоспарланып отыр»,- деді сенатор.
Жалпы бүгінгі таңда «Ақтау теңіз порты» арнайы экономикалық аймағына салынған инвестицияның жалпы көлемі 266,1 млрд теңгені құрайды, оның ішінде шетелдік инвестициялар - 168,7 млрд теңге, 406,7 млрд теңгеге өнім өндірілді. 1780-нен астам жұмыс орны құрылып, салық төлемдерінің сомасы 54,2 млрд теңгеге жетті.