Атырау станциясында жұмыс өнімділігі төмендеген

Мұнайлы өңірдің бас қақпасы Атырау станциясы бойынша жұмыс өнімділігі былтырғы жылғы көрсеткішпен салыстырғанда төмендегені байқалады. Бірінші класты учаскелік станцияда барлық инфрақұрылым жұмыс істеп тұр.

Дегенмен, шешімін таппай келе жатқан мәселе де жоқ емес. Мысалы, станцияда ұзындығы 1250 метр болатын 9 қабылдап-жөнелту жолы, 6 сұрыптау жолы, аз қуаттағы дөңес, №26, №27, №35 үш тартымдық жолы бар. Соңғыларына 85-90 вагон сыйса, №26 тартымдық жол қысқа, тек 54 вагон ғана сыяды. Ал ол вагондарды тарату кезінде екіге бөлініп, қиындық туғызады. Оны ұзарту мәселесі көптен айтылып келе жатқанымен, шешілген жоқ.  

Станциядан жөнелтілетін пойыздардың саны, яғни өткізу қабілеті бүгінде тәулігіне 20-22 пойызға тең. Жұмыс өнімділігінің төмендеуіне келсек, орташа тәуліктік жүк тиеу көлемі жоспарда 8,0 вагон болса, нақты 2,5 вагон тиеліп, 31,25 пайызды құрады. Тоннамен есептегенде 119,2 тонна тиеліп, жоспар 227,5 пайызға орындалған. Вагон саны азайғанымен, салмақты жүктер көбейген. Ал жүк түсіру тәулігіне 50,3 вагонды құрап, 91,2 пайыз ғана орындалған, себебі жоспарланған жүктер келмеген. Ал жергілікті вагондардың бір жүк операциясына тұруы 94,0 пайызға жетіп, статистикалық салмақ 105,4 пайызға орындалды, себебі ауыр салмақты жүктер көп түсірілген.  

– 2022 жылғы 1 наурыздан бері Украинаға жүк жөнелтуге және Солтүстік кавказ темір жолына пропан-бутан өнімін жіберуге тоқтам қою тасымал көлемінің кемуіне әсер еткені рас. Сондай-ақ өңірдегі ірі жүк жөнелтуші алпауыт компаниялармен Мақат, Құлсары, Теңдік, Қарабатан станциялары арқылы экспорттық бағыттағы пропан, бутан, мазут, кокс, күкірт тиелген вагондар келісілмегендіктен және тапсырыс берушілердің бас тартуы себепті тиелмей қалды. Теңізшевройл, Атырау мұнай өңдеу және Болашақ зауыттарының жыл барысында бірнеше рет жөндеуге тұруы да тасымал көлеміне әсер етті, – дейді станцияның бас инженері Бекжан Жиенбетов.  

Жалпы Атырау станциясында вагондар бірнеше бағытта жөнелтіледі. Ақсарай түйіспесіне – үш бөліктен тұратын вагондар (жоғары Басқұншақ, Астрахань, Грузия, Әзербайжан республикалары жолдарына), Мақат бағытында (Орта Азия, Маңғыстау түбегіне, Қандыағашқа), Ақжайық және Теңдік станцияларына, республикаға маңызы бар Атырау мұнай өңдеу зауытына бос және жүк тиелген вагондар сұрыпталып жеткізіледі. Мұнайлы өңірдің маңызын арттырған бас темір жол станциясы аймақтағы барлық кәсіпорындармен тығыз байланыста.