Бөлімше директоры шағын бекеттерді аралап, теміржолшылармен кездесті

Атырау магистральдық желі бөлімшесінің директоры Аралбай Қосымбаев өзінің орынбасарлары және бөлім басшыларымен бірге Құлсары, Мақат, Сағыз, Опорный, Толтыр, Бейнеу станциялары мен шағын бекеттерді аралап, жергілікті теміржолшылармен кездесті.

Жұмысшының еңбек орнында жағдайын жасау – Компания басымдық беріп отырған міндеттердің бірі. Бұл ретте атыраулық теміржолшыларға жасалып жатқан игілік баршылық, дегенмен әлі де шешімін күткен мәселе аз емес екен. 2023 жылы өңірге бес тонналық 95 контейнер жеткізіліп, станциялар мен разъездерге орналастырылған. Былтыр да сондай 37 тұрғын-модульдік ғимарат алынып, теміржолшылар игілігіне берілген. Мұның бәрі жұмысшылардың санитарлық-тұрмыстық жағдайларының жақсаруы мен еңбек ету деңгейінің көтерілуіне үлкен ықпалын тигізді.  

– Біздің бүгінгі іссапарымыздың негізгі мақсаты – сіздермен жүзбе-жүз кездесіп, әңгімелесіп, проблемаларды бірге шешіп, сұрақтарыңызға құлақ асу. Сондықтан комиссия құрамындағы мамандарға сауалдарыңызды жолдай беріңіздер. Сондай-ақ қауіпсіз еңбек жағдайы мен еңбек сапасын дамыту бойынша атқарылып жатқан жұмыстардың есебі мен алдағы жоспары жөнінде де ақпарат беріледі, – деді А.Қосымбаев.  

Персоналды басқару бөлімінің бастығы Анар Жалғасбаеваның атап өткеніндей, 2025 жылы 1 қаңтарда штаттық кесте бойынша 2122 адам және 65 адам басқару аппаратында тіркелген. Жұмыс істеп жатқан 2 және 3-топтағы мүгедектер саны 27 адамды құрайды. Былтырғы жылы санаторлық-емдік шипажайда демалғандар саны – 122 адам, оның 50-і зейнеткер. ҚТЖ филиалдарының жұмысшылары мен қызметкерлеріне еңбекақы төлеу схемаларына (4, 5-қосымшаларға) сәйкес 01.01.2025 жылдан бастап 1 және 5 дәреже арасындағы «жұмысшылар» санатынан басқа барлық қызметкерлердің жалақысы 7%-ға; 1 және 5 дәреже арасындағы «жұмысшылар» санаты бойынша жалақы 8,5%-ға өскен. Арнайы киім, арнайы аяқ киім және арнайы қорғаныш құралдарымен уақытылы қамтамасыз етіліп, жұмыс орындарын аттестаттау қорытындысы бойынша арнайы сүт, еңбек демалысына үстеме демалыс күндері беріледі.  

Көпшілік өздерін толғандырған сұрақтарын қойды. Бөлімше теміржолшылары «Архимедес» клиникасына тіркелген, алайда Құлсары қаласында оның филиалы жоқ екен. Басқа клиникалар келісімшарт бойынша қарайды, алайда оның да мерзімі өтіп кетіпті. Сондай-ақ кейбір санаттарға жалақы 7%-ға көбейтілмеген. Бір мамандардың еңбек демалысы 36 күн болса, енді бірінікі 30 күн. ІІІ топ мүгедектік алған С. оған бөлімше тарапынан ешқандай көмек болмағанына шағымданса, қармен күрес науқаны кезінде жолды тазалауға шыққандар сол күндерге қалай қосымша жалақы төленеді, жеке табыс салығы жеңілдігі кімдерге беріледі деген де сауал болды.

Қысқы аязда, жазғы ыстықта төленетін қосымша ақы кімдерге тиесілі, жол техникаларын жөндеуге апарып, кері қайтарда СВ мен Тальго пойызына алынған билет құны неге жұмысшыларға төленбейді, 55 жаста зейнетке шығу жолдары қандай, т.т. сауалдарға кадр және заң мамандары жауап берді.  

Жалпы, Атырау облысы мен Маңғыстау облысының аудандық коэффициенті жер мен көктей, Маңғыстау аумағында жұмыс жасайтын, бірақ Атырау бөлімшесіне қарайтын мамандардың жалақысында айтарлықтай айырмашылық бар. «Атырау облысы бойынша ортақ коэффициентке келтіріліп – 1,50%, Маңғыстау – 80% өңірлік коэффициентпен алады. Бізге жоқ, ал Маңғыстау облысына төленіп отыр, не себепті?» дейді олар. Толтыр, Бейнеу станцияларында да жұмысшылар тарапынан арыз-шағым көп айтылды, олар спорттық жарыстарға қатыса алмайтынын, өйткені Атырауға баратын жол ақысы, іссапар шығыны қарастырылмағанын жеткізді. Кей станцияда жұмысшылар арнайы киімнің сапасы нашар екенін сөз қылды.  

Жұмысшылармен кездесу барысында көтерілген барлық мәселелер қатталып, оң шешімін табу жолдары қарастырылатын болады.