Болашақ станциясында жаңа ойын алаңы ашылды
Маңғыстау облысы бойынша меншікті тілші
Болашақ станциясының балақайлары су жаңа ойын алаңына ие болды. Жақында ғана ауылдың кішкентай тұрғындарына базарлық ретінде бой көтерген алаңқай қолданысқа берілді. Жаңалыққа балалар ғана емес, ата-аналар да риза.
Болашақ ауылдық округі әкімі аппаратының ақпаратына сүйенсек, жоба құны 10 миллионнан асады. Ойын алаңында 300 шаршы метрге газон төселген. Онда ағаштан жасалған, шағын және секірмелі әткеншектердің ойын топтамасы мен карусель, сырғанақ, құм алаңы бар. Ата-аналар мен балаларға арналған аула орындықтары және олардың қасына қоқыс жәшіктері орнатылған.
Бұл Болашақ тұрғындары үшін соңғы кезде жасалған жалғыз игілікті іс емес. Биылғы бес айдың есебін қорытындылаған ауыл әкімі Сыйлыбай Аманқұлов құны 11,9 млн теңгені құрайтын, заманауи жабдықталған балалар ойын алаңы пайдалануға берілсе, тағы бір ойын алаңы мен ұзындығы 4700 шаршы метрді құрайтын жаяу жүргіншілер жолы, орталық саябақ, волейбол, баскетбол алаңдары салынып жатқанын тілге тиек етті. Айтуынша, станция көшелері түнгі уақытта да жарқырап тұрады. Жарықтандыру бағытында көшелердегі және ашық футбол ойын алаңындағы істен шыққан ескілері алынып, 45 дана LED жарық шамдары орнатылған.
