Асқаралы алпыс асуында
Теміржол саласына қырық жылға жуық ғұмырын арнаған «ҚТЖ» ҰК» АҚ Ақтөбе жүк тасымалы бөлімшесінің жетекші инженері Түгел Боранбаев асқаралы алпысқа келіп отыр, деп хабарлайды "Қазақстан теміржолшысы" газетінің тілшісі.
Әріптестері мерейтой иесі туралы жылы пікірде, өз ісін жетік білетін маманмен қатар адамгершілігі асқақ азамат деседі. Ал Түгел ағамыз болса, өмірін теміржолмен байланыстырғанын тағдырдың сыйы деп біледі.
«Оқу бітірген мамандығым да қозғалыс қауіпсіздігі болатын, қазіргі күнге дейін осы салада жұмыс жасап келемін. 17 жыл бойына диспетчер болып жұмыс істеп, пойыздар қозғалысын реттеп реттеп отырдық. Батыс өңірі бойынша 6 жол бөлімшесі бар. Тепловоз шаруашылығының, вагон шаруашылығының ревизорлары, қозғалыс учаскелік ревизорлардың жұмысын қараймыз. Қозғалыс қауіпсіздігінде жалпы саны 60-қа жуық адаммен жұмыс жасайды екенбіз. Әр жұмысшының өз міндеті бар. Олардың ай сайынғы жұмыс нәтижесіне бақылау жасап отырамыз», - дейді Ақтөбе жүк тасымалы бөлімшесінің жетекші инженері Түгел Боранбаев.
Теміржолшы ағамыздың темір жол саласына қызығушылығы балғын балалық шағынан басталған. Сол себепті ол мектеп бітіргесін құжаттарын 1975 жылы темір жол техникумына тапсырыпты. Оқып жүрген уақытында әскери борышын өтеп, 1980 жылы оқуын бітіреді. Дипломына қосып, Жіңішке станциясына жолдама алған жас маман сол жылы алғаш рет еңбек жолын бастады. Пойыз құрастырушысының көмекшісі, станция кезекшісі болып алты жыл еңбек етіп, кейін пойыз диспетчері қызметіне ауысады.
«2008 жылдан бастап Батыс өңірлік қозғалыс қауіпсіздігі бөлімі ашылды. Мені сол бөлімге жетекші етіп тағайындады. Содан бері осы қауіпсіздікті қадағалаушы қызметімен абыроймен атқарып келемін. Бұл қызметтің де өз жауапкершілігі, күрделі тұстары бар. Кейде тәртіпті талап еткен кейбір адамдарға жақпай жатады. Бірақ, темір жол титтей де кемшілікті көтермейді, әсіресе, пойыздар қозғалысының қауіпсіздігін сақтау мәселесінде бұл талап қатаң сақталуы тиіс. Темір жол саласына жұмыс істеуге келген адам өзін тәртіпке бағынуға үйрету керек. Қозғалыс қауіпсіздігінің нұсқаулығы мен техниканы пайдалану ережесін жатқа білуге тиіс», - дейді Түгел Боранбаев.
Ардақ ЕРУБАЕВА, Ақтөбе