Шахматтан жеңімпаз атанды
Семей ЖТ бөлімшесі бойынша тақталы ойынның шахмат түрінен ерлер арасында кезекті біріншілік болып өтті. Биылғы сайыстың ерекшелігі сол, осыған дейінгі чемпиондар қатысқан жоқ. Яғни, жеңімпаздарды жаңадан анықтаудың мүмкіндігі туындады.
Бөлімшенің спорт нұсқаушылары осынау жолғы жарысты өзгеше форматта ұйымдастырды. Жас ерекшелігіне шектеу қойылған жоқ. Сондай-ақ, алғашқы кезеңде сайысқа ынта білдірген кез келген адам қатысып, келесі айналымдарда топ жеңімпаздары өзара іріктеліп, анықталып отырды. Осылайша, ақтық финалға кілең мықтылар ғана жеткен болатын.
– Ойын барысы тартысты ғана емес, мейлінше қызықты өрбіді. Алғашқы кезең бойынша әрең дегенде келесі айналымдарға шыққандар ойынның соңына қарай ғайыптан күш алып, ақтық сайыста кездесті, – дейді аталмыш чемпионатты ұйымдастырушылардың бірі, бөлімшедегі «Локомотив» спорт клубының спорт нұсқаушысы Наталья Мешкова.
Теміржолшылар арасындағы тақталы ойын тарландарына бұл жолы төрт орын берілді. Бұл ретте ЖТ бөлімшесінің қызметкері Берік Қамзабаев төртінші орынды иеленсе, Семей станциясы атынан қатысқан Марат Қорабаев жүлделі үшінші орынды қанағат тұтты. Ал, ӘТЖК филиалы қызметкері Болат Омаров екінші орын алса, НЖС-6 қызметкері А.Есенаманов бірінші орынды жеңіп алды. Барлық жеңімпаздарға мақтау қағаздары мен бағалы сыйлықтар тарту етілді.
Қуаныш Қожаев, Семей