Сергектік сыйлаған сапар
Спорт – адам денсаулығын шыңдап, сергектік сыйлайтыны сөзсіз. Сонымен қатар, спорт адамдарды бір-біріне жақындастыратын корпоративтік шара. Жуырда Астана қаласында өткен сайыс – соның айғағы.
Мен 2008 жылдан бері Құлсары белгі беру және байланыс дистанциясында КТСМ электр механигі болып жұмыс жасаймын. Отбасымда 5 қызым бар. Осы жылдың 29 қазан–3 қараша аралығында Астана қаласында «КТЖ» ҰК» АҚ ұйымдастырған «Әкем, анам, мен – спортшы жанұямыз» атты отбасылық сайысқа жолдасым Балқан Самендирова және 2006 жылы туған қызым Нурсаулемен қатысып қайттық. «Нұрлы Жол Астана» вокзалынан түскен бізді арнайы такси күтіп алып, қонақ үйге әкеліп орналастырды. Ол жерде жан-жақтан келген әріптестерімізбен кездесіп, танысып, пікірлесіп риза болдық.
Сайыс болатын жерге бізді арнайы көлікпен апарып, әкеліп тұрды. Сайыстың ашылу салтанаты, ондағы концерттік қойылымдар тамаша өтті. Ұйымдастырушылардың шешімімен әр отбасын топтарға бөлгенде, менің отбасыма әр өңірден келген үш отбасы келіп қосылды. Олар Семей, Павлодар және Алтынкөл стансасынан келген екен. Бір-бірімізбен танысып-біліскен соң, бірлесіп командымызға «Құлагер» деген атау бердік және ұранын дайындадық. Жеңіске жетеміз деген сеніммен сайысқа қатыстып, бірінші турдан өтіп, жартылай финалға жеттік. Сайыс әділ өтті. Біздің тобымыз 4-орын алды, жеңіске жетпесек те еш реніш болған жоқ. Басқа командалар жеңісіне қуана қол соқтық. Жаңа достар тапқанымызға қуанышты едік. Сайыстан соң да бір-бірімізбен хабар алысып, қатысып тұратын болып, қимай қоштастық.
Бос уақытымызда отбасымызбен Астана қаласын араладық, алған әсерімізді ауызбен айтып жеткізе алмаймыз. Бізді ертіп апарған Атырау теміржолының спорт нұсқаушысы, жетекшіміз Ринат Имангазиев әрдайым жанымыздан табылып, жағдайымызды сұрап, жоғымызды тауып беріп отырды. Жалпы, сайыстың жоғары дәрежеде ұымдастырылғанына баршамыз риза болдық. Барша қатысушылар атынан теміржолшылардың корпоративтік рухын көтеру мақсатында осындай шараны ұйымдастырып отырған «Қазақстан темір жолы» Ұлттық компаниясына үлкен алғыс айтамын.
Нұрлан Анетов, теміржолшы
Атырау