Достық жеңді

 «ҚТЖ» ҰК АҚ – Шымкент магистральдық желі бөлімшесінің теміржолшылары арасында спорттың сан түрлерінен сайыс ұйымдастыру – дәстүрге айналған шара.  

Мысалы, өткен сенбіде Шымкент қаласындағы Манчестер спорт кешенінде жарыстың үш түрінен теміржолшылар арасында сайыс өтті. Командалар мини-футболдан, үстел үсті теннис пен шахматтан өзара жарысты.  

Таңертең басталған сайысқа 6 команда қатысты. Олар НОД ЖТ-9, НЖС-9, ШЧ-38, Арыс станциясы, ЛОИС, «Транстелеком» АҚ, ӘТЖБ командалары. Әрине, әр команда жеңіс үшін барын салып, шаршы алаңда «өліп-тірілді» десек болады.

Үш сағатқа созылған сайыстың нәтижесінде жүлдегерлер де анықталды. Шағын футболдан 1-орынды ӘТЖБ командасы, 2-орынды НОД ЖТ, 3-орынды НЖС-9 командалары өзара бөлісті. Ал шахмат пен үстел үсті теннисінен әйелдер арасынан Әсекерилендірілген теміржол күзеті филиалының бухгалтері Гүлжан Таменоваға шақ келер қарсылас болмады.

– Теміржолшылар арасында осындай сайыстарды жиі өткізіп тұруға тырысамыз. Мақсат – теміржолшылар арасында бұқаралық спортты дендеп енгізу, сала жұмысшыларының арасындағы аурулар түрін азайтып, денсаулықтарын күшейтуге күш салу, саламатты өмір салтын ұстануға үндеу,сонымен қатар халықаралық және республикалық жарыстарға ҚТЖ құрама командасының арасынан мықты спортшыларды іріктеу жұмыстарына мақсатты түрде дайындау болып табылады, – деп пікір білдірді шараға демеушілік жасаған Шымкент магистральдық желі бөлімшесі кәсіподақ кеңесінің төрағасы Ерлан Серперов.

Жеңіске жеткені де, жетпегені де бар, сайып келгенде «достық жеңді» деген тұжырым жасалып, барлық қатысушыларға естелік сыйлық табыс етілді.

Жансая СЫДЫҚБАЙ, Шымкент