Алматы теміржолшылары арасында бильярдтан біріншілік өтті

Алматыда магистральдық желі бөлімшесі жұмыскерлерінің арасында бильярдтан біріншілік өтті. Спорттың бұл түрінен қысқы сайыс өткізу дәстүрге айналған. 

Бильярд үстелінің басына бұл ойынның ережелері мен тәртібін сақтай отырып, ойын техникасын көрсете білген ойыншылар жиналды.

Ойын өте тартысты өтті. Әсіресе бірінші орын алған вокзал шаруашылығы бөлімінің инженері Асқар Сейітов асқан шеберлігімен көзге түсті. Алғашқы минуттардан-ақ бар ынтасын ойынға қойып, сауатты ойнап, керемет ойын техникасын көрсете білген ол шеберлігімен тәнті етті.

Екінші орын алған коммерциялық ревизор Руслан Бектібаевтың да ойынын бақылау қызық болды. Оның бильярд таяқшасын қолына ұстағанынан-ақ оның қандай ойыншы екенін байқауға болатын еді.

Ал үшінші орын осындай сайыстардың тұрақты қатысушысы – теміржолшы ардагер Мұрат Омарбековке бұйырды. Ол да өзіне нық сеніммен ойнағаны көрініп тұрды.

– Жылдан-жылға бильярд ойнаушылардың қатары артып келе жатқаны бізді қуантады. Теміржолшылар арасында танымалдылығы жағынан бильярд мини-футболмен қатар тұр, – деді Алматы магистральдық желі бөлімшесінің спорт жөніндегі нұсқаушысы Альберт Қолдасбаев.

Кездесу соңында қатысушылар кубоктармен, Құрмет грамоталары және бағалы сыйлықтармен марапатталды.

Милена ҚАЙЫРОВА, Алматы