Бейнеу жол дистанциясы қауіпсіздік талаптарын қалтқысыз сақтайды
Бейнеу жол дистанциясында өндірісте жарақатты болдырмауға және еңбек қауіпсіздігіне арналған іс-шаралар жасақталып, барлық жұмыстар соның аясында жүзеге асырылады.
Дистанция қызметкерлеріне жол бойында болған жарақат алу деректері кезектен тыс нұсқау жүргізу және техникалық сабақтар өткізу арқылы жеткізіледі. Сонымен қатар “Жолда адам” ақпарат жүйесі жұмыс істейді. Дистанция басшысы Берікбай Айтымановтың айтуынша, барлық айналымдар мен цехтарда еңбек қорғау бұрыштары жасалған.
"Бұған қоса қатаң есептегі құрал-саймандардың есебі жүргізіледі. Техникалық оқыту дистанция директорының бекіткен жоспары бойынша айына жол жөндеушілермен 2 рет, механизаторлармен 1 рет тәжірибе жүзінде көрсету арқылы жүргізіледі. Дистанция бойынша әртүрлі тақырыпта, мысалы аралық пункттерді күтіп-ұстау, бағыттама бұрмалар күтімі, ең үлгілі безендірілген табель, бұрылысты жолдар күтімі деген сияқты тақырыптарда тәжірибе алмасу мектебі өткізіліп тұрады. Бұл ретте жолдың жағдайын жақсы қалыпта ұстап тұрумен қатар жолдың ағымдағы күтімін жақсарта білген, баллдық жоспарды әрдайым орындап отыратын, пойыз жұмыстарында ақау жібермеген, еңбек тәртібі жақсы, жалпы басқа айналымдарға үлгі болатын айналым байқау бойынша анықталады", - дейді дистанция бастығы.
Соңғы жылдары дистанцияға қарасты жол бөлігінде бірде-бір төтенше жағдай болмапты. Мұның бәрі де мамандардың біліктілігі мен білімін ұдайы жетілдірудің арқасында болып отыр. Мекеме қызметкерлерінің қатарын жас маман кадрлармен толықтыру мәселесіне зор мән беріледі. Осы орайда дистанция басшысының бастамасымен 35 қызметкер темір жол саласында жоғары оқу орындарында өндірістен қол үзбей оқып, мамандықтары бойынша өндіріске араласқан. Кадрларды даярлау мен оқыту, біліктілігін арттыру жөнінен жасалған кестеге сай мамандар Астана, Ақтөбе қалаларындағы оқыту орталықтарына жіберіліп тұрады.
Жалпы дистанциядағы жол шаруашылығының жұмыстары, техникалық бөлім жұмыстары, оған сабақтасып жатқан кадрлармен жұмыс жасау, қаржыны үйлестіру, техникалық қауіпсіздік, техникалық сабақтар өткізу, диспетчерлік басқару сияқты маңызды жұмыстарды басқарып жүрген бас инженер А.Мұханов, техникалық бөлім бастығы Г.Сариева, кәсіподақ төрағасы М.Кожбанов, еңбек қорғау инженері Г.Далабаева болып табылады. Ұжым қатарын жас мамандармен толықтыра отырып, ізгі жұмыстарды игерген және еңбектерін еселеген ұжым - Бейнеу жол дистанциясы алдағы уақытта да мемлекет тапсырмалары мен талаптарын толықтай орындайтынына, жоғары биіктерде көріне беретініне сенім мол.
Ұлан ОРАЗ