Елу жылда – ел жаңа
Тәуелсіздігімізді ту етіп көтерген жылдары Алматыда студенттік шағын өткізген теміржолшылар жоқ емес. Қазақ тарихында ызғарлы із қалдырған 86-ның ылаңын көзбен көрген де солар. Солардың бірі – «Теміржолсу» ЖШС Ақтөбе филиалында кадр қызметінің менеджері Гүлжан Көптілеуова.
Алматы темір жол институтын қызыл дипломмен бітіргеннен кейін Шалқар станциясына жұмысқа тұрады. Станциядағы қозғалыс саласына тиесілі біраз қызметтің «дәмін татты», тәжірибе жинақтады. Ал 1994 жылдан бастап қалаға қоныс аударып, кадр саласына біржолата ауысты. Станция басшысының кадр ісі жөніндегі көмекшісі, 1999 жылы басқармаға ауысып, оншақты жыл кадр бөлімінде еңбек етті. Қазір «Теміржолсу» серіктестігінің кадр бөлімінде қызметін жалғастырып жатыр. Кейіпкеріміздің жалпы еңбек өтілі отыз жылдан асыпты.
Бүгінде 52 жасқа шыққан Гүлжан Алматы теміржол көлігі инженерлері институтында оқыған студенттік жылдарын сағынышпен еске алады. Әйгілі желтоқсан оқиғасы болған кезде ол небары 20 жастағы студент екен. «Біз институтта өтетін Жаңажылдық балмаскарадқа дайындалып, мәре-сәре болып жатқанбыз. Он күн, он бес күн қалды деп күн санап жүрген жастармыз. Кенеттен бұрқ ете қалған желтоқсан оқиғасы туралы алғашқы күні кешке естідік. Масанчи көшесіндегі жатақханада тұрдық. «Далаға шықпаңдар, студенттер қозғалысы болып жатыр» деп мұғалімдеріміз үш күнге жатақхананы жауып тастады. Ұстаздарымызға осындай қамқорлығы үшін алғыс айтуымыз керек шығар. Олар үш күн бойына бізді күзетті. Сырттан тамақ әкелуге екі адамнан кезектесіп шығамыз. Сол кезде дүрмекке еріп алаңға шықсақ, бірдеңеге ұшырар ма едік, кім білген...», – деп еске алады кейіпкеріміз сол жылдар оқиғасын.
Сол жылы Жаңа жыл студенттер үшін тым сұрықсыз да көңілсіз өткен. Тіпті асығып күткен кеш те жастарға еш қызық сыйламапты. Кешегі қамсыз, мұңсыз жүрген жастар бір сәтте он жылға есейіп кеткендей әсер қалдыратын еді дейді кейіпкеріміз. «Бүгінгідей заманға жету үшін қандай да бір өзгеріс керек болған шығар. Қазір бәрі жақсы жағына өзгерді, біз сол аңсаған арманымызға жеттік, тәуелсіздігімізді алдық. Әлем елдері егемен елімізді мойындады. Бейбіт елде тыныш өмір сүріп жатырмыз. ТМД елдерінің ішінде бірінші болып «ЭКСПО» көрмесін өткіздік. Темір жол тұрақты даму үстінде. Ең қиын кездердің өзінде темір жол саласы элиталы қызмет саналды. Мен институт бітіргеннен бастап темір жол саласында еңбек етіп келемін. Осы уақыт ішінде қаншама өзгерістерге куә болғанымызды енді кезіп отырғандаймын. «Елу жылда – ел жаңа» деген осы шығар», – дейді Гүлжан Көптілеуова.
Ардақ ЕРУБАЕВА, Ақтөбе
Суретті түсірген автор