Жылдамдыққа жауапты
Ақылбек Жаппаров – Арыс станциясында вагондар қозғалысының жылдамдығын реттеуші маман. Отыз жылдан бері осы станцияның «ыстығына күйіп, суығына тоңып» дегендей еңбек етіп келе жатқан теміржолшы күнделікті міндеті – станциядағы дөңестен вагондарды сұрыптап, реттеп, олардың бір-бірімен соғылмауын қадағалау.
Ақылбек Жандарбекұлының бір салада табан аудармай осынша уақыт еңбек етіп келе жатқаны оның төзімді де қажырлы болмысын сипаттайды десек, қателеспейміз. Мінезі байсалды, біртоға жігіт ағасы өз жұмысын жақсы біледі, ешқашан шалағайлыққа жол берген емес.
Айта кетейік, Арыстағы дөңес паркінде вагондарды жөнелтетін 8 парк бар. Жұмыс уақытын осы дөңесте вагон құрамаларын сұрыптаумен өткізетін Ақылбек сонымен қатар, вагондардың жай-күйіне де, жолдың сапасына да қарайды, вагондардың санына қарай «башмак» қояды. Ақау тапса дер кезінде басшыларға жеткізіп, қауіптің алдын алуға ықпал етеді. «Жұмысым қиын емес деп айта алмаймын, қиындығы да бар, жауапкершілігі де жоғары, үйреніп қалған тірлігім болған соң қиындығы білінбейді. Жұбайым да, балам да темір жол саласында еңбек етеді. Балам – машинист. Осы теміржолдың арқасында әлеуметтік жағдайымыз жаман емес. Жыл сайын еңбек демалысына шығып, денсаулығымызды шыңдап, шипажайға барып тұрамыз. Жылы киім, сүт, отын-көмір уақтылы беріліп тұрады, – дейді теміржолшы жігіт.
Теміржолдың у-шуына да, ондағы қыз-қыз қайнаған тіршілікке де сіңісіп кеткені сонша, жыл сайын бір рет еңбек демалысына шыққан кезде бір ай сыртта жүріп жұмысын сағынады екен. «Қай жаққа барсам да үйге жеткенше асығамын. Пойызда отырып туған Арысымның төбесін көргенде қуанамын. Мен жалпы патриотпын, туған жерімді, елімді сүйемін, Тәуелсіздігіміздің бізге қандай күшпен келгенін білемін. Сондықтан тамшыдай болсын еліме қызмет етіп жатқаныма шүкіршілік етемін. Еліміз аман болсын, ең бастысы осы», – деп ағынан жарылды Ақылбек аға.
Жансая СЫДЫҚБАЙ, Арыс – Шымкент
Суретті түсірген автор