Арнайы комиссия Астана жол дистанциясы қызметкерлерінің еңбек жүктемелерін тексерді
Жол дистанциясындағы әрбір жұмыс орнын аттестациялау 5 жылда бір рет жүргізіліп отырады. Оны мамандандырылған ұйымдар арнайы келісім-шарт жасай отыра өткізеді. Соның барысында кез келген қызметтің зиянды факторлар жағдайына жақындығы анықталады.
– Мәселен, сондай аттестацияны М.Тынышбаев атындағы Қазақ көлік және коммуникациялар колледжі жасайтын болып, олардың өкілі біздің мекемеге келді. Олар әрбір жұмысшының жұмыс аймағында шу, діріл, еңбектің жүктемесінің қаншалықты көптігін тексерді. Зиянды факторлар өзінің шегінде болса, онда бәрі дұрыс. Ал шектен шыққан жағдайда ол зиянды факторы бар жұмыс болып саналады да, сол қызмет бойынша еңбекақыға үстеме ақы төлеу, сүт бөлу, қосымша демалыс күндерін беру секілді жұмыстар жүргізіледі. Осыған орай аттестация жүргізуші мамандандырылған ұйым өкілдері жазбаша түрде әрбір мамандықтың қауіптілігі мен зияндылығына байланысты қорытынды шығарады, – дейді Астана ірілендірілген жол дистанциясының жетекші еңбек қорғау инженері Зылхия Батышева.
Астана жол дистанциясында, мысалы, былтыр 13 маман, 2017 жылы 12 маман аттестациядан өткен екен. Аттестациялау жұмыстары 1 аптаға дейін созылуы мүмкін. Жауапты маманның айтуынша, бұдан бөлек жолшылар жоспарға сай қауіпсіздік саласы бойынша Темір жол көлігі персоналын басқару және дамыту орталығында білімдерін жетілдіріп отырады. Олардың әрбірі еңбек қорғау мәселелері бойынша 48 сағаттық және өндірістік қауіпсіздік мәселелері бойынша да 48 сағаттық білім алу курсынан өтеді. Сонымен қатар өндірістік қауіпсіздік бойынша 10 сағаттық білім алу курсынан Қарағандыдағы оқу орталығында да өткізіледі. Осы аталған соңғы оқу курсы бойынша былтыр 142 адам білімін жетілдірген екен. Оның ішінде стропальщиктер, компресс қондырғылары мен кран машинистері, газ электр дәнекерлеушілері бар. Ал еңбек қорғау мәселелері бойынша өткен жылы 61 басшылық қызметтегілер оқытылған. Атап айтқанда, жол шеберлері, дистанция директоры мен оның орынбасарлары, бас инженер және жетекші еңбек қорғау инженері де соның ішіне кіреді. Осындай оқудан өтіп, арнайы сертификат алмайынша, қайсыбір басшы болсын нұсқаулық өткізе алмайтын көрінеді.
– 48 сағаттық оқу дегеніміз – 5 күн оқу. Оқу кезінде жұмыскерлерге бәрі де тәртіп бойынша бұйрық шығарылып, іс-сапар құжаты толтырылады. Соңғы оқу күнінде олар тест тапсырады және өндірістік қауіпсіздік бойынша билет сұрақтарына ауызша жауап береді. Үш жылда бір рет осы бойынша сертификат алып отыруға тиіс. Мекемедегі мыңға жуық адам өз ретіне қарай білімін толықтырып отырады, – дейді З.Батышева.
Ұлан ОРАЗ