Серік Әбденов ұлттық компаниядағы жастар саясаты туралы айтып берді
Қоғам болған соң жетім мен жесір болмай тұрмайды. Дей тұрғанмен, ежелден жетім-жесірін жылатпаған елдің бүгінгі ұрпағы қоғамның аз қамтамасыз етілген бөлігіне қамқорлық жасау үрдісінен шет қалып жатқан жоқ. Әсіресе жастар белсенді. Соның ішінде «Қазақстан темір жолы» ҰК» АҚ және оның еншілес ұйымдарының жастары өздерінің қайырымдылық істерімен танылып отыр.
Жалпы, Білім және ғылым министрлігінің балалардың құқықтарын қорғау комитеті мәліметіне қарағанда, 1999-2012 жылдары елімізде 47421 бала асырап алынса, ал 2013-2017 жылдар аралығында 12420 бала отбасылық ортада өмір сүруге көшкен. Мемлекет тарапынан асырап алынған әр бала үшін жәрдемақы төленеді. Әрине қанша қамқорлық таңытылса да, ол бәрібір баланың биологиялық әке-шешесінің орнын алмастыра алмасы анық.
«ҚТЖ» ҰК» АҚ Басқарма төрағасының корпоративтік мәселелер жөніндегі орынбасары Серік Әбденов жастардың кәсіби және тұлғалық өсуіне қатысты өткізген брифингінде жастардың ізгілікке толы игі істері басшылық тапсырмасымен емес, өздерінің жеке бастамаларымен жүзеге асып жатқандығына ерекше назар аудартты. Жалпы бүгінгі таңда Компания мен оның еншілес ұйымдарында 52 мың жас қызметкер жұмыс істесе, бұл барлық қызметкерлер санының 39% құрайды. Ұйымшыл жастар тіпті әлеуметтік желіде өздерінің «Zhastemir.kz» сайтын ашып, белсенділігін танытып келеді. С.Әбденов Компания жастарының бірқатар игі істерін атап өтті. Мысалы, Астана магистральдық темір жол бөлімшесінде жұмыс істейтін бір теміржолшының екі баласы да церебралды сал ауруына шалдыққан. Жастар ұйымы аталған отбасыны қолдау мақсатында қолдарынан келген көмегін аяған емес. Бұдан басқа, ақтөбелік жас теміржолшылар Алға станциясындағы балалар үйіне барып, әртүрлі қайрымдылық шаралар ұйымдастырып жүр. Ал Семейдегі балалар үйінің тәрбиеленушілерін жас теміржолшы отбасылары демалыс кездерінде 10 күнге дейін үйлеріне сұрап алып, отбасылық жылулықтарын сыйлайды және тәлім-тәрбиелерін көрсетіп келеді. Ал қызылордалық жас теміржолшылар балалар үйінің тәрбиеленушілерін аквапаркке апарып, кешке дейін солармен қыдырып, бір күндерін арнауды дәстүрге айналдырған. Сөз реті келгенде С.Әбденов бір кездері Өскемен өңірінде жетім балаларға болашақта баспана сатып алу үшін Құрылыс жинақ банкінде арнайы есеп-шот ашып қаржы аудару тәжірибесінің сәтті жүзеге асып жатқандығына да назар аудартты. Жастар 10 баланы патронаждық қамқорлықтарына алып, Құрылыс жинақ банкінде қаражаттарының жиналуына көмек көрсетуде. Баланың кәмелет жасына толуына дейін тиісті қаражатын жинап, оның баспаналы болуына қолғабыс ететін жастардың бұл қайырымдылығы өзге өңірлерге де қолдануға тұрарлық тәжірибе ретінде танылуда.
Қорыта айтқанда, жетім балалар мәселесі қоғам болып қолға алатын маңызды шара екені белгілі. Соңғы жылдары жетімдер санының азайып келе жатқаны көңілге медеу. Дей тұрғанмен, кейбір жастардың қателігінен өмір есігін ашқан бейкүнә сәбилердің тағдыры жауапкершілігі бар жандарды, атап айтқанда теміржолшы жастарды бей-жай қалдырмауда.
Асқар Исақов, Астана