Еңбек қорғау мамандары Қызылорда жол дистанциясының теміржолшыларымен кездесті
Қызылорда жол дистанциясының еңбек қорғау және техникалық қауіпсіздік бөлімі мамандары жол монтерлерінің хал-ахуалымен танысып, оларға қажеттінің ау-жайын білу үшін станция-бекеттердегі учаскелерді аралап, жұмысшылардың жағдайын көзбен көріп, кемшіліктерді дер кезінде түзетуді дәстүрге айналдырған.
Биыл да осы дағдымен Қызылорда жол дистанциясының бас инженері Ақылбек Әбілдаев, мекеменің еңбек қорғау инженері Майра Бадрақова, кәсіподақ ұйымы төрайымы Ғалия Ноғайбаева және бөлім басшыларынан құралған жұмыс тобы Жалағаш, Тереңөзек, Белкөл, Қараөзек және Сұлутөбе станцияларындағы жолшы қауымымен кездесу өткізді.
Кездесу барысында жол монтерлерінің білімі тексеріліп, олардың кәсіби міндетті атқару деңгейі сарапталды. Дистанция жолшылары еңбегінің қорғалуы, техникалық қауіпсіздікті меңгеруі бақыланса, олардың маусымдық киіммен қамтылуы, қорғаныс заттарымен қамтамасыз етілуі де көзден таса қалмады.
– Мекеменің шағын бекеттердегі учаскелерін аралап жүріп ондағы жұмысшылардың жағдайымен танысып, олардың кәсіби міндетіне жауапкершілігін бақыладық, техникалық білімін, біліктіліктерін тексеруден өткіздік. Жолшылардың жағдайы жақсы болса, жұмыс та өнімді болмақ. Сондықтан кездесу кезінде олардың ұсыныс пікірлерін де тыңдадық, қолдан келер өтініш-сұраныстарын шешуге күш салдық. Олардың жағдайлары жақсы, өз міндеттерін атқаруға еш кедергі жоқ екеніне толық көз жеткіздік, – дейді дистанцияның кәсіподақ ұйымы төрайымы Ғалия Ноғайбаева.
Сабырхан СЕЙІЛБЕКҰЛЫ, Қызылорда
Суреттерді түсірген автор