Шалқар теміржолшылары жастар форумын өткізуге дайындықты бастап кетті
Шалқар аудандық теміржолшы жастар арасында форум өтпек. Шараға тоғыз бірдей темір жол мекемесінен жас мамандар қатысады.
«ҚТЖ» АҚ Ақтөбе магистральдық желі бөлімі Шалқар электрмен жабдықтау дистанциясының инженер-технологы Сәндібек Төлебаев аудандағы теміржолшы жастар кеңесінің төрағасы болып тағайындалды. Құрылғанына санаулы күн болған жаңа кеңестің жоспарлары ауқымды. «Теміржолшы жастар форумын өткізуге қатысты ұсыныс аудандық әкімдіктен жасалды. Біздің дистанция бойынша 29 жасқа дейінгі 42 маман бар. Форумға аудандағы барлық теміржол мекемелерінің жастары атсалысатын болды. Яғни теміржолшы жастар осы жастар жылында ауқымды жұмыстарды қолға алатын болады. Форумда соны бекітеміз», – дейді жастар кеңесінің төрағасы.
Форумның қаржыландыру жұмыстарын аудан әкімдігі мойнына алып отыр.
«Аудандағы тоғыз бірдей теміржол мекемесінде жастар кеңестері құрылды. Негізгі мақсат – теміржолшы жастардың белсенділігін арттыру. Жылдың соңында үздік теміржолшы жас маман марапатталатын болады. Бұл шараларға аудандық бюджеттен ақша қаралды», – дейді Шалқар аудандық жастар ресурстық орталығының басшысы Жанна Әбденова.
Жастар кеңесіне мүше болған теміржолшы жастардың қолына куәлік берілетін болады. Бұл құжатпен жас мамандар жергілікті әкімдікке еркін кіре алады.
Ардақ САТТАРҚЫЗЫ, Ақтөбе