Атаулы жылға дайындық жоғары
Елбасының бастамасымен биыл Жастар жылы жарияланғалы бері теміржолшы жастар да бұл идеяға қолдау білдіріп, жер-жерде түрлі шаралар өткізуге дайындықтар жасауда. Солардың қатарында Достық станциясының жастары да бар.
Станция кезекшісі әрі «ҚТЖ» ҰК» АҚ басқарма төрағасы жанындағы жастар ісі жөніндегі кеңестің Достық станциясы бойынша аймақтық төрағасы Диас Байқонысовтың айтуынша, олар Жастар жылына арнайы жоспар құрыпты. Енді сол бойынша жыл бойына жұмыстар жүргізбек.
– Жоспарға сай алдымен барлық қызметкерлерді «ҚТЖ» ҰК» АҚ-ның 2016-2021 жылдарға арналған жастар саясаты бағдарламасының міндеттерімен таныстырамыз. Екінші 35 жасқа дейінгі жас қызметкерлер тізімін жасап, оларды базаға енгізу көзделген еді, соның нәтижесінде станцияның өзінде 300-ге жуық, ал басқа ұйымдарды қосқанда 370 жас қызметкер бар екені анықталды. Одан соң ерікті түрде Кеңес қызметінің нақты бір бағыттары бойынша жауапты адамдарды тағайындауды жоспарлап отырмыз. Бұл ұлттық компанияның әлеуметтік мәселелер және персоналды басқару бойынша вице-президенті бекіткен аймақтық өкілдер туралы Ережесінің 4-тарауы, 8-тармағы, 3-тармақшасына сәйкес жүргізіледі, – дейді аймақтық өкіл Диас.
Сонымен қатар бұл жоспарда станция қызметкерлеріне компанияның корпоративтік сайты zhastemir.kz туралы ақпарат беру туралы да жазылған. Сондай-ақ жыл сайынғы «Сен болмасаң, кім?» жазғы лагеріне баратын команданы құраушы мықты жас қызметкерлерді іріктеу, оларды шара аясындағы түрлі байқаулармен хабардар ету, қатысушы аймақтардың визиткасын дайындау мәселесі де қарастырылған. «Жас кәсіби маман», «Менеджмент жобасы», «Болашақ басқарушылар» жыл сайынғы жобаларға қатыстыру үшін сапалы материалдар мен құжаттар іріктеу бойынша түсіндіру жұмыстарын жүргізу жайы айтылған. Мұның мақсаты – компанияның жан-жақты дамуына тікелей атсалысатын жастардың анағұрлым белсенді тобын ынталандыру. Бұл жобаларға жастар арасынан 40 және одан көп адамды қамту көзделген.
Тағы бір дәстүрлі ерекше шара «Біз станция тазалығын қолдаймыз» акциясы болғалы тұр. Мақсат – станция аумағында жаппай сенбіліктер ұйымдастыру арқылы жастардың еңбек белсенділігін арттыру және жұмыс орындарын таза ұстауға шақыру. «ҚТЖ» көңілді тапқырлар ойынына қатыстыру үшін Достық станциясында осы ойындарды өткізу арқылы мықты команда дайындау жоспарланған. Шілде айында дөңгелек үстел өткізіп, алғашқы жарты жылда жасалған жұмыстарды қорытындылау, кемшін тұстарды анықтап, оларды жою, белсенді жас қызметкерлерді «Алғыс хатпен» марапаттау да назардан тыс қалмайды. Одан кейін тамыз айында «Мектепке жол» акциясын өткізіп, аз қамтылған отбасылардан шыққан оқушыларға материалдық көмек көрсету қарастырылып отыр. Жылдағыдай қараша айында жастар форумына дайындық жүргізіп, желтоқсан айында жыл бойына жасалған жұмыстарды дөңгелек үстел басында қорытындылау жоспарлануда.
Ұлан ОРАЗ